Ŋikiru. 81 - Ebaibul

Kiyayak Akuj Ŋisirael aŋuna esyaketa (Ekiruk ka Asap neni a ŋolo apolokinit aeore)

¹ Toeoto icelasi neni ka Akuj a ŋina erae agogoŋu yok; toeoto ka alelyanu neni ka Akuj a Yakob.

² Kisyakisi eete, torama ŋiburin, toeikisi ŋieosyo ŋulu abobok iramete ŋaduŋgui ka ŋagitae

³ Tokutakisi abureryaŋ a emesek elomuni elap ŋolokitete ka apaki ŋina ilesikinor elap kidiama, akoloŋit ŋina a ŋasuban yok:

⁴ Kitiya ŋun anerae erae ŋun etal a Ŋisirael, ŋakiro ŋuna etubunit Akuj a Yakob.

⁵ Abu iŋes kituruwo ŋakiro ŋun ekisil aneni a Yosepu apaki ŋina etijikinio akwap ŋina a Ijipit. Apupi ayoŋ etoil a ituŋanan a ŋini nyayeni,

⁶ ebala iŋes, “Abu ayoŋ olema egogos aloseketa kus; abu esieŋa ŋakan kus aloticisyo a ŋulu agogoŋok.

⁷ Alocan kus ipotu iyes itonyarata ayoŋ, ido abu ayoŋ okoiu iyes, abu ayoŋ okoboŋok iyes anakibois a ŋina emunono a ŋina ayai neni agiro; abu ayoŋ ekekatak iyes apaki ŋina iyakatar locowae ŋulu a Meriba.

⁸ Kiirasi, okoe ŋituŋa kaŋ, apaki na ŋina ekeyayakinitor ayoŋ iyes; okoe Ŋisirael, acamit ayoŋ iyes ikiirasi ayoŋ erae kipedorete!

⁹ Nyiyakaunotor akuj ŋina egelaana kidiŋ kus; nyemaikina iyes toryediko, kilipa neni ka akuj a ŋina egelaana.

¹⁰ Arae ayoŋ Ekapolon Akuj kus, ŋina abu okoyau iyes eketipeunio anakwap a ŋina a Ijipit; toruworos ŋulu ikinyoma, ido akainakini ayoŋ iyes ŋiboro ŋulu ajokak.

¹¹ “Nai apotu ŋituŋa kaŋ nyiirasi ŋuna erworo ayoŋ; apotu Ŋisirael nyekewuapa ayoŋ.

¹² Aŋun, abu ayoŋ emyek ikes kiwuapa ŋuna acamito ŋitai kec ŋulu esyaak, kiwuapa ŋuna acamito ikes ŋikulepek.

¹³ Okoe, anica kiirasi ŋituŋa kaŋ ŋuna abala ayoŋ, anica kiwuapa Ŋisirael ŋuna abala ayoŋ!

¹⁴ Iŋes nai areunia ayoŋ ŋimoe kec atipei, erita ŋimoe kec daadaŋ.

¹⁵ Eryamunio atemar erae ŋulu eremokino Ekapolon ŋikalyokonok, erubakini akisicanio kec ŋikaru ka ŋikaru.

¹⁶ Nai eketani ayoŋ iyes a ŋikinyom a ŋulu ikwaan ka erau, a ŋulu ajokak nooi; ekesimwoni ayoŋ iyes ka ao a ŋina eyai natabab.”