Ŋikiru. 80 - Ebaibul

Akilip aŋuna ka alakuno a Isirael (Ekiruk, kori Acamunet ŋina ka Asap neni a ŋolo apolokinit aeore)

¹ Okoe Ekeyokon a Ŋisirael, kiirarae isua; ekarikon ŋolo iyoki ŋiletok a Yosepu ikwa iyokiyere ŋamesekin. Iyoŋ ŋolo iboi alokicoloŋ kon alokidiama ŋisubuna ŋulu a ŋabebenuk,

² okoe ekeyokon a Ŋisirael, kitoodiun neni a ŋatekerin a Epuraim, ka Benjamin ta Manase. Kitoodiu agogoŋu kon; bua toiunae isua!

³ Okoe Akuj, kinyakakinae isua ajokis ŋina sek ikiyakar, kisyoni isua, ikotere isua ikiiun.

⁴ Okoe Ekapolon Akuj ŋina a ŋajoresyo, apaki ŋina etya ai irubakinia iyoŋ iŋoit iwounit aboŋokin ŋakilipeta a ŋituŋa kon?

⁵ Iinak iyoŋ ikes akimuj akiyaloloŋ iinak iyoŋ ikes akimat ŋakiyo ŋuna alalak.

⁶ Ituruwo iyoŋ akwap kosi ŋina emaryaete ŋikidunyet kosi; ikikyenatar isua ŋimoe kosi.

⁷ Kinyakunae isua, okoe Akuj ŋina a ŋajoresyo; kisyoni isua, ikotere isua ikiiun.

⁸ Ibu iyoŋ yau Ŋisirael alo Ijipit; Ibu iyoŋ kirita ŋituŋa a ŋakwapin, ido kiwuak Ŋisirael nen.

⁹ Ibu iyoŋ kitemonok akwap aŋuna a Ŋisirael, ido apotu Ŋisirael toloma nakwap ŋin kilelebun nakwap ŋin daadaŋ.

¹⁰ Apotu ikes toloma nakwap ŋin daadaŋ ameun alo Kwap tari Kuju lomoru ŋulu a Lebanon.

¹¹ Apotu ikes kitodolo ŋikukworin a akwap kec ameun ananam Mediteranian tari naŋolol Eupurate.

¹² Kaanukiro nai imyekinia iyoŋ ŋimoe a Ŋisirael eremete akwap a Ŋisirael? Aruwor tokona akwap a Ŋisirael neni itoreneneete ŋituŋa ŋulugelae, inyasete ka eŋasete ŋiboro keŋ.

¹³ Ipudaete ka icakuraete tokona ikes akwap ŋin lopite ŋolo icakuraata ŋiputiro akwap, ido inyasete ikes akwap ŋin lopite ŋolo inyasata ŋityaŋ ŋulu ka ariet.

¹⁴ Toboŋu neni kosi, okoe Akuj ŋina a ŋajoresyo; kiŋoliu kwap anakuj ikiŋolik isua; bua toiu ŋituŋa kon.

¹⁵ Bua toiu ŋituŋa kon ŋulu ibu iyoŋ kiwuak nakwap na, kituruwo ŋituŋa ŋulu agogoŋok anakwap kec.

¹⁶ Ecunyasi ŋimoe ŋituŋa kon ka amunyasi; elipi tomunya iyoŋ ŋimoe kosi anaŋoit kon.

¹⁷ Nai kiyok tokona ŋituŋa kon ŋulu idau iyoŋ aseun, ŋituŋa kon ŋulu idau iyoŋ akitogogoŋ aŋuna kon.

¹⁸ Nyikiŋeri nai isua iyoŋ jik; kiteyarae isua, ido ikipuri isua iyoŋ.

¹⁹ Okoe Ekapolon Akuj ŋina a ŋajoresyo, kinyakunae isua; kisyoni isua ikotere isua ikiiun.