Ŋikiru. 77 - Ebaibul

Atamun ŋiticisyo ka Akuj ŋulu ka aumokin (Ekiruk ŋolo ka Asap neni a ŋolo apolokinit aeore)

¹ Egworo ayoŋ eoroe neni ka Akuj ekeŋarak ayoŋ; egworo ayoŋ neni ka Akuj ekeira ayoŋ.

² Apaki ŋina ayakar ayoŋ locan, abu ayoŋ elip neni a Ekapolon; akuwar kya, abu ayoŋ elip ekyaarit ŋakan kaŋ, ido abu etau kaŋ nyisirworiun.

³ Ani atamuni ayoŋ Akuj, ekalou; ani atamatamae ayoŋ ŋuna ka Akuj, emam akisimukekinet aryamuni.

⁴ Ibu iyoŋ Akuj nyikicamak ayoŋ ojotoor; aryamu ayoŋ ŋican nooi, nyapedori akirworikin.

⁵ Atamatamae ayoŋ ŋuna a ŋirwa a ŋulu koloŋ sek, atamunit ŋuna a ŋikaru a ŋulu koloŋ sek.

⁶ Aayenene ayoŋ akuwar daadaŋ atamatamae nooi; atamatamae ayoŋ eŋita alotau kaŋ ebe,

⁷ “Ikiŋeri mono Ekapolon isua ŋikaru ka ŋikaru a? Nyikitoodikini mono iŋes isua ajokis keŋ nabo a?

⁸ Adaun mono jik amina keŋ ŋina nyiryaŋiryaŋa a? Nyeriŋa mono jik Akuj isiyookini ŋakiro ŋuna abu iŋes ikiik a?

⁹ Emuryak mono Akuj araakau Akuj ŋina esyonon a? Alema mono iŋes aŋuna ka aŋoit keŋ akisyon keŋ a?”

¹⁰ Abu nai otema, “Ŋuna akanomorito ayoŋ nooi ikes nu, nyeriŋa Akuj eyakar apedor.”

¹¹ Emaikina ayoŋ otamu ŋiticisyo kon, okoe Ekapolon; ee, emaikina ayoŋ otamu ŋakiro kon ŋuna ka aumokin ŋuna koloŋ ibu iyoŋ kitiya.

¹² emaikina ayoŋ otamatama ŋuna a ŋiticisyo kon a daadaŋ, otamatama ŋiticisyo kon ŋulu ka aumokin.

¹³ Okoe Akuj, esegak ŋiticisyo kon daadaŋ akuj ani ace epol akilo iyoŋ?

¹⁴ Iyoŋ Akuj ŋina itiyae ŋuna ka aumokin; idau iyoŋ akitoodikin apedor kon neni a ŋituŋa a ŋakwapin.

¹⁵ Ibu iyoŋ tolaku ŋituŋa kon a apedor kon, ibu iyoŋ tolaku ŋipapae a Yakob ka ŋulu a Yosepu.

¹⁶ Okoe Akuj, apaki ŋina ibunio iyoŋ neni aya ŋakipi, apotu ŋakipi tomaranikis, abu kwap ŋakipi neni ecukul tomaranik.

¹⁷ Apotu ŋidouwon tobukut ŋakipi; abu kidiama togirok; abu akimilyaa kielun alowaetin a daadaŋ.

¹⁸ Aponi kiirarae agiro kon alokuwuam a ŋolo akusi nooi. abu akimilyaunet kon kinwak akwap; abu akwap tomaranik ka kiryaŋiryaŋakin.

¹⁹ Abu erot kon kitor kidiŋ anam, abu erot kon kitor kidiŋ ŋakipi ŋuna alalak nooi; ido mam ituŋanan abu kiŋolik ŋikukus kon.

²⁰ Ibu iyoŋ torik ŋituŋa kon ikwa ŋamesekin, ibu iyoŋ torik ikes, inak Moses ka Aron kitena ikes.