Ŋikiru. 76 - Ebaibul

Akuj a Isirael, iŋes erae ekatubon ŋakiro a akwap a daadaŋ (Ekiruk kori eete ŋolo ka Asap neni a ŋolo apolokinit aeore ŋina eeoi isitiyao ŋiboro ŋulu a ŋiunoi.)

¹ Eyenen Akuj alo Yudaya, itopolooritae nooi ekiro keŋ alo Isirael.

² Eyai ere keŋ Yerusalem, iboi iŋes alo Sion.

³ Abu iŋes tobilibilaa a nen ŋikaleŋeleŋe ŋulu agumunito ŋimoe keŋ, abu iŋes tobilibilaa a nen ŋiboro a ŋimoe ŋulu ke ejie lu: Ŋaupala ka ŋileŋia.

⁴ Ipol iyoŋ nooi, eiliili nooi apolou kon iloit tari ŋimoru ŋulurubae.

⁵ Ademar ŋikadedeŋak ibore daadaŋ ŋini a ŋatunito adaut atwakare; mam ipei daŋ alokajiok kec ŋini abu toji.

⁶ Anakiŋenyakinet kon, okoe Akuj a Yakob, apotu ŋaŋolei kaapei ka ŋikametok kec topero alokwap etwakito.

⁷ Iyoŋ bon emaikina itokeri. Ŋae epedori akiwo alokiŋaren kon apaki ŋina iŋoitor iyoŋ?

⁸ Ibu iyoŋ anakuj totub ŋakiro, abu tobul ŋituŋa daadaŋ, kililiŋa cek,

⁹ apaki ŋina inyounio iyoŋ Akuj akitub ŋakiro ka aiun daadaŋ ŋulu isicanitae anakwap.

¹⁰ Iinanakini iyoŋ tari ŋiryenyaanotin ikipuro iyoŋ, ido epote ŋipiya ŋulu ka aŋoit kon, akilip neni kon anapakio a ŋuna a ŋasuban.

¹¹ Kikoŋo neni ke Ekapolon Akuj kus ido kisiyookisi ŋuna idaut akikoŋ; emaikina ŋituŋa a ŋakwapin a ŋuna idunyatar iyes yaut ŋainakineta neni ka Akuj a ŋina emaikina tokeritetei.

¹² Einanakini Akuj ŋikepukak ŋulu eturok aruwor ŋulu ecaryooko; ekerito iŋes ŋirwosi ŋulu ka akwap.