Ŋikiru. 75 - Ebaibul

Alakara neni ka Akuj aŋuna a ŋiticisyo keŋ a ŋulu ka aumokin (Ekiruk ka eete ŋolo ka Asap neni a ŋolo apolokinit aeore, ebala eete lo, “Nyimunaa.”)

¹ Okoe Akuj, ikilakara isua neni kon, ikilakara isua; iserao isua apolou kon, irworosi ŋituŋa ŋuna a ŋiticisyo kon a ŋulu ka aumokin.

² Ibala iyoŋ ebe, “Adau ayoŋ aseun apaki ŋina ka akitub ŋakiro, ayoŋ atubi ŋakiro anakiyookino.

³ Ani emaranikini akwap ka ŋisubuna daadaŋ, ayoŋ esicasi ŋipirin ŋulu ewuar akwap.

⁴ Abala ayoŋ neni a ŋiketurok ebe, ‘Tojoŋoto akituro jik,’ ido abala neni a ŋulu aronok ebe, ‘Tojoŋoto akitiya aronis.

⁵ Tojoŋoto akirworo itoroniarito Akuj; tojoŋoto akisyaanu.’ ”

⁶ Mam ipei daŋ ŋini alo Kide, kori alo To, kori analoŋisat, ŋini emaikina kitopoloo ituŋanan.

⁷ Nai Akuj bon eyakar apedor akitub ŋakiro, iŋes ituruwori ice icaryoit ka kitopoloo ice.

⁸ Eŋoit Ekapolon, eŋoit iŋes nooi, eakik iŋes anyunyura keŋ neni a ŋulu aronok; esunyuak iŋes aŋoit keŋ daadaŋ neni kec.

⁹ Ani eruwor ayoŋ, alelyani ŋikaru ka ŋikaru; aeo ayoŋ epuro Akuj a Yakob.

¹⁰ Elemari Akuj apedor a ŋulu aronok a daadaŋ, nai iatakini apedor a ŋulu iyookino.