Ŋikiru. 74 - Ebaibul

Adyekitoi aŋuna akiŋarakino anapaki a ŋina enyasuniata ŋimoe Isirael (Ekiruk ŋolo ka Asap.)

¹ Okoe Akuj, kaanukiro ikiŋeryo iyoŋ isua ŋikaru ka ŋikaru? Ipedori mono iyoŋ aŋoikin ŋituŋa kon a alope ŋikaru ka ŋikaru a?

² Totamu ŋituŋa kon ŋulu ibu iyoŋ; toseu koloŋ sek toruwor ŋituŋa kon, totamu ekabila ŋolo ibu iyoŋ; toiu anapitoonut aruwor ŋituŋa kon a alope. Totamu emukura Sion neni koloŋ sek iboiyo iyoŋ.

³ Kitor nakiboisyo ŋun ŋuna enyasun jik, enyasut ŋimoe kosi ibore daadaŋ alo Kai ka Akuj.

⁴ Acelasi nooi ŋimoe kon alotooma akibois kon ŋina asegan; ewuanakis ikes nen ŋabenderae kec, itoodiunito atemar ikilout ikes isua.

⁵ Etakanete ikes esibito ŋikayepak ŋikito anamoni, ŋulu eyepete ŋikito a ŋaepe kec.

⁶ Atubutuboosi ikes ŋiboro ŋulu icetae anakito ŋulu eya nakibois ŋin, isitiyaete ikes ŋaepe ka ŋinyoodoi.

⁷ Ecunyakis ikes Akai kon; amunaasi ikes akibois ŋina sek ikilipere iyoŋ.

⁸ Ebasi ikes make, “Emunyaryo iwon ikes todaunos jik”; ecunyasi ikes ŋakiboisyo kosi daadaŋ anakwap, ŋuna ecunanakinoi isua akilip neni kon.

⁹ Nyeriŋa isua ikiŋolyanakini ŋimacarin ŋulu a ŋitalyo kosi, emam ekadwaran idoŋit epei daŋ, emam ipei daŋ alokidiŋ kosi ŋini eyeni apaki ŋina edaunotor ŋakiro nu.

¹⁰ Okoe Akuj, apaki ŋina etya ai eayete ŋimoe kon ikijamuwarito iyoŋ? Erubakinete mono ŋimoe kon iyanyete ekiro kon ŋikaru ka ŋikaru a?

¹¹ Kaanukiro iwounitor iyoŋ akiŋarakin isua? Kaanukiro iwounitor iyoŋ akiŋarakin isua anakiro a nu?

¹² Torae bo iyoŋ Akuj erwosit kaŋ ŋinapei koloŋ, idau iyoŋ akiŋarakin isua akiloun ŋimoe kosi anakwap kosi.

¹³ Ibu iyoŋ anapedor kon totyak anam; ibu iyoŋ tomunya Ŋijipitian.

¹⁴ Ibu iyoŋ tomunya ŋikadedeŋak, ibu iyoŋ inak ikes toruworos akimuj a ŋityaŋ a ŋulu ka ariet.

¹⁵ Ibu iyoŋ toŋaana ŋiitan tolelyata ŋakipi alolelyan ka anayona, ibu iyoŋ kitoon jik ŋaŋololin ŋuna sek aleleata ŋakipi jik.

¹⁶ Ibu iyoŋ tosub apaaran ka akuwar; ibu iyoŋ tosub akoloŋ ke elap ta ŋikacer.

¹⁷ Iyoŋ ibu kiwuak ŋikukworin daadaŋ ŋulu ka akwap; iyoŋ ibu kiwuak akamu ka akiporo.

¹⁸ Okoe Ekapolon, totamu epite ŋolo ikijamuwaritotor iyoŋ ŋimoe kon, totamu epite ŋolo iyanyata ŋibaŋaanotin ekiro kon.

¹⁹ Nyijalak ŋituŋa kon ŋulu epalag, neni a ŋimoe kec a ŋulu adedeŋak, nyiŋer ŋikaru ka ŋikaru ŋituŋa kon ŋulu isicanitae.

²⁰ Totamu acamunet ŋina ibu iyoŋ ocamunotor ka isua, anerae ileleba aryenyeo neni daadaŋ eŋopitotor ŋulu itiyaete aronis.

²¹ Nyicamak ŋulu isicanitae isurumyo ŋileec; kimyek kipuro ekiro kon ŋulu a ŋican ka ŋulu eyakatar akiitanit.

²² Okoe Akuj, tonyou, kitoodik ŋimoe kon atemar nyiyookino ikes; totamu epite ŋolo ikijamuwaritotor iyoŋ ŋibaŋaanotin apaaran jwii.

²³ Nyijamak ecelet a ŋimoe kon a ŋulu eŋoito, nyijamak ecelet ŋolo erubakinitotor ŋimoe kon ecelasi.