Ŋikiru. 72 - Ebaibul

Akilip aŋuna ke erwosit kitenae ka kigaŋae (Ekiruk a Solomon)

¹ Okoe Akuj, inak erwosit totub ŋakiro anakiyookino ka inak akiyookino neni a erwosit kosi.

² Elipit totubonok iŋes ŋituŋa kon anakiyookino, ido kipuka ŋulu a ŋican anakiyookino.

³ Elipi toraa ŋikinyom anakwap aŋuna a ŋituŋa, elipi kitiyakin ŋun nakwap aŋuna ka akiyookino a ŋituŋa.

⁴ Elipi toik erwosit ŋulu a ŋican alotuŋa, inak akiŋarakinet neni a ŋulu iitanito akiŋarakino, ka tomunya ŋulu etiŋito ŋulu a ŋican erono.

⁵ Elipi torubakis erwosit ka ŋiletok keŋ ipukato ŋikaru ka ŋikaru, alotooma ŋanyameta daadaŋ.

⁶ Elipi inak erwosit ajokis anapukan keŋ, ŋina ikoni ŋina einakini akiru ŋikinyom ŋulu elomete elipi kikok iŋes akiru ŋina itojoki akwap.

⁷ Elipi tolalaar akiyookino alorwa a ŋulu ipukator iŋes, elipi torubak ekisil ŋirwa daadaŋ ŋulu ipukator iŋes.

⁸ Elipi kipuka iŋes ameun ananam a ŋinace tari ŋinace ka ameun anaŋolol Eupurate tari nakisalet a akwap.

⁹ Elipi kilounae ŋimoe keŋ alokiŋaren keŋ, elipi toreu iŋes ŋimoe keŋ.

¹⁰ Emaikina inakis ŋirwosi ŋulu a Tarisis ka ŋulu a ŋiculeta iŋes ocur, emaikina yaut neni keŋ ŋirwosi a Ceba ka Seba ŋainakineta.

¹¹ Emaikina kilounae ŋirwosi daadaŋ alokiŋaren keŋ, emaikina kitiyata ŋituŋa a ŋakwapin a daadaŋ neni keŋ.

¹² anerae iŋaranakini iŋes ŋulu iitanito akiŋarakino apaki ŋina enyaraata iŋes, iŋaranakini iŋes ŋulu a ŋican ka ŋulu emam ikeŋarakinan.

¹³ Isyoniyenene iŋes ŋulu epalag ka ŋulu iitanito akiŋarakino, ido eiununui akiyar a ŋulu iitanito akiŋarakino.

¹⁴ Elakununui iŋes akiyar a ŋituŋa a ŋul aneni a ŋulu isicanito ikes ka toryenyanikinito; epol nooi akiyar a ŋituŋa a ŋul anakonyen keŋ.

¹⁵ Agasi ayoŋ torubak iŋes eyari jik! Elipi ayoŋ inakinae iŋes egolid ŋolo a Ceba. Elipi ayoŋ kilipete ŋituŋa aŋuna keŋ jwi jwi ido togatunito ŋarereŋisyo aŋuna keŋ apaaran jwii.

¹⁶ Elipi tolalata nooi ŋikinyom anakwap keŋ, elipi kigoonoto ŋaraito alokamukumukui elipi kikokis ŋaraito ka akwap keŋ ŋuna ka akwap a Lebanon; elipi tolalata ŋituŋa alotaunio ka akwap keŋ, lopite ŋolo elalaata ŋinya anariet

¹⁷ Elipi nyimuryakin ekiro ke erwosit ŋikaru ka ŋikaru, elipi torubakis erwosit ka ŋiletok keŋ ipukatoŋikaru ka ŋikaru. Eryamunete ŋakwapin daadaŋ arereŋu aŋuna keŋ, ido enyaraete ikes iŋes ŋolo erereŋ.

¹⁸ Akipuro toyai neni ke Ekapolon Akuj, Akuj ŋina a Isirael, iŋes bon itiyae ŋiticisyo ŋulu ka aumokin.

¹⁹ Akipuro toyai neni ka Akuj aŋina eyakar apolou ŋikaru ka ŋikaru; elipi kilelebun apolou keŋ nakwap daadaŋ. Amen! Amen!

²⁰ Esalakin ne ŋakilipeta a Daudi alokoku a Yese.