Ŋikiru. 71 - Ebaibul

Akilip aŋuna ka akiuryaro alorwa a daadaŋ a ŋulu ka akiyar ka akiŋarakino

¹ Okoe Ekapolon, abunit ayoŋ neni kon aryamun aiuno; nyikimyek ayoŋ ekesurumyo ŋileec.

² Anakiyookino kon, tolakunae ayoŋ ka toiunae ayoŋ; topupokinae ayoŋ, ido itoiu ayoŋ.

³ Toruwor aneni kaŋ ataaba ŋina aiunor ayoŋ, toruwor aduketait ŋina ajio ŋina agogoŋon ŋina akaiuni ayoŋ, anerae irae iyoŋ ataaba kaŋ ŋina kiupala ka aduketait ŋina ajio ayoŋ.

⁴ Okoe Akuj kaŋ, toiunae ayoŋ, anapedor a ŋulu aronok, toiunae ayoŋ anapedor a ŋulu nyiyookino, ido torae ŋiryenyaanotin.

⁵ Okoe Ekapolon iyoŋ irae akigeno kaŋ, okoe Ekapolon ekekinyomit ayoŋ iyoŋ ŋinapei anasoroko kaŋ.

⁶ Neni kon iŋes ekinyomit ayoŋ ŋinapei ekedounere; arae iyoŋ ibu ikiyok ayoŋ ŋinapei anakook a toto kaŋ. Ekepuri ayoŋ iyoŋ jwi jwi.

⁷ Arae ayoŋ ŋinapei akitaanyunet ŋina ajokan neni a ŋikalalak, nai iyoŋ irae neni egogoŋ neni aiunor ayoŋ.

⁸ Ekepuro ayoŋ iyoŋ jik ka eketopoloorit iyoŋ apaaran jwii.

⁹ Nyikirita ayoŋ nariet apaki ŋina amojoŋia; nyikimyek ayoŋ apaki ŋina edaunor agogoŋu aneni kaŋ;

¹⁰ anerae ekerworotor ayoŋ ŋimoe kaŋ; etukosi akiar ayoŋ ŋulu ekemanito ayoŋ.

¹¹ Ebasi, “Aŋer Akuj iŋes; ewuapa iŋes ekamutu, anerae emam ŋini eiuni iŋes.”

¹² Okoe Akuj, nyieka aneni kaŋ; okoe Akuj kaŋ kiwonyu atipei, ikiŋarak ayoŋ.

¹³ Elipi kisurumae ŋileec ka tomunyarae ŋulu ekesitakinito ayoŋ; elipi tojamuwarae ka tokyenare ŋulu iwarito akiwan ayoŋ.

¹⁴ Nai arubakini ayoŋ egeno jik, ido ekepuri iyoŋ ŋapakio ka ŋapakio.

¹⁵ Eserae ayoŋ lotuŋa ŋiticisyo kon ŋulu ka akiyookino, eserae ayoŋ apaaran jwii ŋuna ikiunia iyoŋ isua, tari pa kayeni ayoŋ epite ŋolokiseraet.

¹⁶ Abuni ayoŋ Kai kon Ekapolon Akuj, eserae ayoŋ akiyookino kon, akiyookino kon bon.

¹⁷ Okoe Akuj, ikitatam iyoŋ ayoŋ ŋinapei anasoroko kaŋ, ido arubakinit ayoŋ eserae ŋiticisyo kon ŋulu ka aumokin.

¹⁸ Tari kamojoŋ ayoŋ kepena ŋakorwo, okoe Akuj, nyikiŋer ayoŋ, akitodol ŋina eseraa ayoŋ agogoŋu kon nanyamet ŋina ebunit ka apedori kon nanyamet ŋina etupakini ŋin.

¹⁹ Okoe Akuj, edolit akiyookino kon kidiama nooi, itiya iyoŋ ŋiboro ŋulu apolok nooi. okoe Akuj, ŋae ikwaanatar iyoŋ?

²⁰ Ikisiŋolik iyoŋ ayoŋ ŋican ŋulu alalak ŋulu apipilak; ikisimukekini iyoŋ ayoŋ nabo; ikiuryari iyoŋ ayoŋ ikotere nyatwana.

²¹ Iyatakinit iyoŋ arwonu kaŋ nooi, ido ikisimukek ayoŋ nabo.

²² Ekepuri daŋ ayoŋ iyoŋ arami aduŋgu aŋuna ka akikinyoma kon okoe Akuj kaŋ, aeikini ayoŋ ekipur neni kon arami agita, okoe iyoŋ ŋina asegan, Akuj a Isirael.

²³ Aceluni ayoŋ alelyani, apaki ŋina aekinio ekepuro iyoŋ; anerae ikiu iyoŋ ayoŋ.

²⁴ Erwori ayoŋ apaaran jwii ŋuna ka akiŋarakinet kon a ŋina iyookino, anerae adaun akisurum ŋileec ka ajamuwar ŋulu ekatakinito akiwan ayoŋ.