Ŋikiru. 68 - Ebaibul

Akipuro ka Alakar neni ka Akuj (Ekiruk a Daudi neni a ŋolo apolokinit aeore)

¹ Elipi tonyou Akuj, elipi kielielaarae ŋimoe keŋ; elipi tobwaŋasi ŋimoe keŋ alokiŋaren keŋ.

² Kirita ikes nariet lopite ŋolo ekutarya ekuwuam apuru nariet; kimyek ŋulu aronok todaunos alokiŋaren kon Akuj lopite ŋolo etalarya amanok anakim todaun.

³ Nai kimyek ŋulu iyookino tolelyana; kimyek ikes tolakaros alokiŋaren kon Akuj; kimyek ikes tolakaros ka tolelyana.

⁴ Toeikisi neni ka Akuj, toeikisi ipurosi ekiro keŋ, kitopoloosi iŋes ŋina edokit ŋidouwon, erae ekiro keŋ Ekapolon, tolelyana alokiŋaren keŋ.

⁵ Akuj ŋina iboi anakibois keŋ a ŋina asegan, iŋes erae papa a ŋikokyok, ekeuryaran a ŋapuseru.

⁶ Akuj iŋes einanakini ŋulu esilikinit ŋituŋa; elacakini ŋulu eenitae toryamut akiyar ŋina ajokan, nai ŋulu eŋerito Akuj, itolomi Akuj ikes neni erae ŋalaro.

⁷ Okoe Akuj, ŋinibore ibunio iyoŋ kiŋarenik ŋituŋa kon, ŋinibore ibunio iyoŋ kitoryo kidiŋ aloŋisat,

⁸ abu akwap tomaranik, tobukunos ŋakirusyo alokidiama, alokiŋaren Akuj, Akuj ŋina a Sinai, alokiŋaren Akuj, Akuj ŋina a Isirael.

⁹ Okoe Akuj, ibu iyoŋ tobuku akiru ŋina alalan nakwap; kitojoku nabo akwap kon ŋina sek abu toruwor akoŋinait.

¹⁰ Apotu ŋituŋa kon kiboikinos nen, ido anajokis kon okoe Akuj, ibu iyoŋ inak ŋikulyak ibore ŋini eitanito.

¹¹ Abu Ekapolon tolimu akirot, ido apotu ŋituŋa ŋulu alalak kiserata akirot ŋin temasi,

¹² “Abwaŋasi ŋirwosi ka ŋikajiok, aema nariet!” Apotu ŋaberu alorerya tokora ŋiboro ŋulu aŋatunitae.

¹³ Ani iperi iyoŋ nalomarisinei a ŋamesekin, iryamuni ŋitorubei a ŋakuryo ebutakinitae esilipa nabebenuk, kiwuakinitetei egolid ŋolo amilimilan nakopir kec.

¹⁴ Ani ielari Akuj ŋina Etiron ŋirwosi alomoru Salimon, abu ekuno min nen.

¹⁵ Erae emoru Basan ŋolo ka Akuj, elalak ŋaitae alomoru Basan.

¹⁶ Kaanukiro irakaanikinitotor iyes ŋituŋa ŋulu ilipete alomoru Basan ŋituŋa ŋulu ilipete alomoru a ŋolo aseu Akuj akiboiyo ŋikaru ka ŋikaru?

¹⁷ Erae ŋagaari ŋuna ka Akuj ŋalipyo ka ŋalipyo; Abu Ekapolon alomoru Sinai nakibois keŋ ŋina asegan.

¹⁸ Ani ŋinibore idokarya iyoŋ Akuj kidiama, ibu iya ŋulu ekamitae alojiesyo; ibu toryamu ŋainakineta alotuŋa, tari aneni a ŋulu aŋerito atemar kiboi iyoŋ a nen, okoe Ekapolon Akuj.

¹⁹ Arereŋu toyai neni ke Ekapolon, a ŋolo jwi jwi ikiunit iwon; Akuj iŋes erae akaiunan yok.

²⁰ Akuj yok iŋes erae Akuj ŋina aiunan; ido neni ka Akuj Ekapolon iŋes ikiryamunia aiun anatwanare.

²¹ Nai iimimaari Akuj ŋakyes a ŋimoe keŋ iimimaari ŋibokoto a ŋulu emasikinito eseceneneete.

²² Abu Ekapolon tema, “Atiyauni ayoŋ ŋimoe kus alo Basan, enyakuni ayoŋ ikes alokwap ŋakipi ŋuna ka anam,

²³ ikotere iyes icakulaete a ŋakejen kus ŋaokot a ŋimoe kus, tomata ŋiŋokwo kus daŋ ŋaokot a ŋimoe kus lotyae ŋolo ecamitotor.”

²⁴ Okoe Akuj ikite isua ŋituŋa ŋulu alalak elosete alotori kon ŋituŋa ŋulu alalak ŋulu ka Akuj kaŋ a Erwosit kaŋ elosete nakibois ŋina asegan.

²⁵ Eyakasi ŋikaeok kiŋaren, toyakas ŋikaramak ŋiboro ŋulu eore kaku, kidiŋ kec, eyakasi ŋapesur ŋuna eramete ŋiburin, ebasi,

²⁶ “Kipuroe Akuj anatukot a ŋituŋa a ŋina alalan, kipuroe Ekapolon iyes daadaŋ ŋiletok a Yakob!”

²⁷ Eŋaranakinito ŋituŋa ŋulu alalak ŋulu alosete ŋul, ŋituŋa ŋulu ka ateker a Benjamin, ŋituŋa ŋulu a ekabila a Benjamin, ekabila ŋolo adit alokabilae a Ŋisirael a daadaŋ, ikes ayakasi kiŋaren ŋituŋa ŋulu alalak ŋulu alosete ŋul, totupakis ŋikarikok a ekabila Yuda, ka asepic a ŋituŋa kec totupakis ŋikarikok a ŋikabilae a Sebulon ka Naputali.

²⁸ Okoe Akuj, kitoodiu apedori kon, kitoodikinae isua agogoŋu kon okoe Akuj lopite ŋolo ibunio ikitoodikinia ekiŋaren.

²⁹ Aŋuna a Akai kon a ŋina eyai Yerusalem, eyaunete ŋirwosi neni kon ŋainakineta.

³⁰ Kiŋenyak ŋituŋa a Ijipit ŋulu ikwaan ka ŋityaŋ ŋulu adedeŋak ŋulu iboiyete anasasak; ŋulu ikwaan ka esipan a ŋimoŋin; ka kiŋenyak ŋulu eyarikinito neni a Ijipit, akitodol ŋina itiditeunotor ikes yaut esilipa kec neni kon. Kielielaa ŋituŋa ŋulu eminasi ejie.

³¹ Epote alo Ijipit ŋikawoikinitok a ŋituŋa a Ijipit; ikyaarete ŋituŋa a Sudan ŋakan kec kilipa neni ka Akuj.

³² Okoe ŋapukasinei a ŋakwapin, toeikisi neni ka Akuj, toeo ipurosi Ekapolon,

³³ toeikisi neni a ŋolo eyai kidiama, kidiama ŋina eyai ŋinapei koloŋ; kiirasi epite ŋolo ecelunia iŋes ke etoil a ŋolo apolon nooi.

³⁴ Kiserata apedor ŋina ka Akuj, Akuj ŋina eyai apolou keŋ ŋina ailiilon Isirael, Akuj ŋina eyai apedor keŋ kidiama

³⁵ Okoe Akuj, irae iyoŋ ŋina ailiilon anakibois kon a ŋina asegan; Akuj a Isirael einanakini Akuj apedor ka agogoŋu lotuŋa keŋ. Toyai akipuro neni ka Akuj!