Ŋikiru. 66 - Ebaibul

Akipuro a Ŋisirael Akuj aŋuna ka ajokis keŋ neni kec (Ekiruk a Daudi neni a ŋolo apolokinit aeore)

¹ Tocelutu ka alelyanu neni ka Akuj, iyes ŋituŋa daadaŋ!

² Toeikisi itopoloorito ekiro keŋ. Kitopoloosi ka kipuro iŋes.

³ Temasi neni ka Akuj, “Eumokinito nooi ŋituŋa ŋakiro ŋuna itiya iyoŋ! Aŋuna ka apedor kon a ŋina apolon nooi, etiditeunosi ŋimoe kon, aryediko alokiŋaren kon.

⁴ Ilipete neni kon ŋituŋa daadaŋ anakwap; eeosi ikipurosi iyoŋ. eeosi ipurosi ekiro kon.”

⁵ Potu toyenutu ŋakiro ŋuna etiya Akuj; eumokina nooi ŋakiro ŋuna etiyae iŋes aŋuna a ŋituŋa.

⁶ Abu iŋes kilocok neni sek arae anam kituruwo akwap neni aonon, apotu ŋituŋa todoka aŋolol a ŋakejen. Aŋun, olelyana neni ka Akuj.

⁷ Ipukat iŋes anapedor keŋ ŋikaru ka ŋikaru, ite iŋes ŋakwapin, nyemaikina ŋulu eŋerito iŋes kiturokinos.

⁸ Okoe ŋituŋa daadaŋ, epuro Akuj yok, emyekisi kiirarae epite ŋolo ipurore iŋes.

⁹ Akuj adau akidar akiyar yok, ido nyimyekina iŋes iwon ikiaryo.

¹⁰ Okoe Akuj, idau iyoŋ akikatakin isua; ikikatak iyoŋ isua lopite ŋolo ikatakinere esilipa.

¹¹ Ibu iyoŋ ikiyau isua tooma atibait; ibu iyoŋ toatonok neni kosi ŋatyokisyo;

¹² Ibu iyoŋ kimyek ŋituŋa ŋulu ameto ŋaŋolei ikipudaete isua; aponi isua toryamununae ŋican ikwa ŋituŋa ŋulu iteryamunito ŋakipi ka akim ŋican; nai ikiyau iyoŋ isua nakibois ŋina ka ajakao.

¹³ Abuni ayoŋ Kai kon ayaunit ŋainakineta ŋuna epeyo; esiyook ŋakikoŋieta kaŋ neni kon,

¹⁴ ŋakikoŋieta ŋuna abu ayoŋ olimu a akituk kaŋ apaki ŋina ayakar locan.

¹⁵ Ayauni ayoŋ neni kon ŋainakineta ŋuna epeyo, ŋuna etumito, ayauni ayoŋ neni kon ŋainakineta ŋuna apeyo ŋuna a ŋimeesekin; ayauni ayoŋ neni kon ŋainakineta ŋuna erae ŋimoŋin ka ŋamee.

¹⁶ Potu kiirasi iyes daadaŋ ŋulu itopoloorito Akuj, ido akalimokini ayoŋ iyes ŋuna etiya Akuj neni kaŋ.

¹⁷ Abu ayoŋ ekalou neni keŋ acela, ido abu akituk kaŋ kipur iŋes.

¹⁸ Ani kerae sek emunonite ayoŋ asecit alotau kaŋ, pa kepupokinit Ekapolon ŋakiro kaŋ;

¹⁹ nai kire adau Akuj akiirar ŋakiro kaŋ; adau apupokin ŋakiro ŋuna ka akilip kaŋ.

²⁰ Arereŋu toyai neni ka Akuj, anerae nyeŋero iŋes akilip kaŋ, kori nyelemara iŋes aneni kaŋ amina keŋ ŋina nyiryaŋiryaŋa.