Ŋikiru. 65 - Ebaibul

Alakar neni ka Akuj aŋuna ke ebari a ŋolo ka akwap (Ekiruk a Daudi neni a ŋolo apolokinit aeore)

¹ Okoe Akuj, emaikina isua ikipuri iyoŋ alo Sion, ikisiyookini isua ŋakikoŋeta kosi neni kon.

² Okoe Akuj iyoŋ iboŋonokini akilip kosi, neni kon iŋes epote ŋituŋa daadaŋ akipuro iyoŋ.

³ Ani apaki ŋina ikilopiyaryata isua ŋasecisya kosi, Isyoni iyoŋ ŋadyakanareta kosi.

⁴ Erereŋ ŋulu iseuni iyoŋ, ido iyau diyete kon, ido kiboikinos nalapatui a Akai kon. Ikimwonikin isua aŋuna a ŋiboro a ŋulu ka ajokis a ŋulu ikiryamuni isua alo Kai kon, alo Kai kon a ŋina asegan.

⁵ Anakiyookino kon, ikiboŋokini iyoŋ isua a ŋiticisyo a ŋulu ka aumokin, okoe Akuj ŋina irae akaiunan kosi; iyoŋ irae akigeno a ŋituŋa a akwap a daadaŋ ka ŋulu eya tari loculeta ka anam ŋulu alwanak.

⁶ anapedor kon, ibu iyoŋ tosub ŋimoru eyai agogoŋu neni kon.

⁷ Isililiŋene iyoŋ akiruruma ŋina a ŋanamyo, akiruruma ŋina a ŋikaguragurae a ŋakipi a ŋuna ekusi ekuwuam ka ecelet ŋolo ikitepegeta iyoŋ ŋituŋa.

⁸ Ekerito ŋulu iboiyete aneni alwanan ŋiticisyo kon ŋulu ka aumokin; Iyaununui iyoŋ alelyanu neni a ŋituŋa a daadaŋ ameun alo Kide tari To.

⁹ Itoodiunit iyoŋ epite ŋolo iminar akwap anainanakin akiru; iwuanakini iyoŋ ebari ŋolo alalan nakwap. Ilelebyanakini iyoŋ ŋakipi naŋololin; itaraenene iyoŋ ŋikinyom anakwap. Epite ŋol iŋes itemonokinio iyoŋ akwap.

¹⁰ Iyakuununui iyoŋ akiru ŋina alalan tolelek ŋakorwon, todaun ŋacukulei a ŋimelekes; itapalali iyoŋ a ŋakipi emanikor, ido kiterereŋ ŋalup toruput ŋikinyom.

¹¹ Ikiinanakini iyoŋ isua ajakao ŋina alalan, ekaku ka akilem, eyai ajakao neni daadaŋ itori iyoŋ.

¹² Elelenakini ŋadakarisinei ŋuna eya naloŋisat, elibununete ŋimukura min akibuses.

¹³ Ilelebunun ŋisipanin a ŋamesekin nadakarisinei, ido ilelebunun ŋikinyom nakadipaalae; elakar ŋinibore daadaŋ lopite ŋolo elakarotor ŋituŋa tocela ka toeoto.