Ŋikiru. 61 - Ebaibul

Ayenut atemar ikiuryari Akuj (Ekiruk a Daudi neni a ŋolo apolokinit aeore ŋina eeoi eramyo ŋiboro ŋulu a ŋiunoi.)

¹ Okoe Akuj, kiira akigworo kaŋ; topupok akilip kaŋ.

² Akanyarit ayoŋ iyoŋ alwana alore, akanyarit aŋuna apapanunia ayoŋ nooi; yaarae ayoŋ neni ayakaun aiuna,

³ anerae iyoŋ irae neni aiunor ayoŋ, aduketait ŋina agogoŋon ŋina ekeuryarit ayoŋ alomoe kaŋ.

⁴ Kimyekinae ayoŋ eboi aloeema kon ŋikaru ka ŋikaru, ikotere oiun alokwap ŋabebenuk kon,

⁵ anerae okoe Akuj, iira iyoŋ ŋuna adau ayoŋ akikoŋ; idau iyoŋ ainakin ayoŋ ŋuna iinanakini iyoŋ neni a ŋulu ikitopoloorito iyoŋ.

⁶ Kiyatak ŋirwa ŋulu ka akiyar ke erwosit elipit torubak erwosit eyari ananyameta a daadaŋ.

⁷ Elipit kipuka iŋes alokiŋaren kon ŋikaru ka ŋikaru; kiyok iŋes a amina kon ŋina nyiryaŋiryaŋa ka akikinyoma kon.

⁸ Aŋun, aeonokini ayoŋ jwi jwi ŋieosyo ŋulu epuror ekiro kon, apaki ŋina esiyoonokinio ayoŋ a ŋinakoloŋit ŋuna adau akikoŋ.