Ŋikiru. 60 - Ebaibul

Akilip ŋina ilipi akwap kedaun akiloun

(Ekiruk a Daudi neni a ŋolo apolokinit aeore, eruko Daudi iŋes aŋuna ka akitatamya, ŋakiro ŋuna ajioto iŋes ka Aram-Naraim ka Aram-Soba ta apaki ŋina kebunio Yoab eboŋuni toar ŋituŋa ke Edom ŋalipyo ŋatomon ka ŋaarei anakadipaalat a ŋina ka Acumbi.)

¹ Okoe Akuj, idau iyoŋ akiŋer isua, iŋoit iyoŋ ŋinapei, okoe toiunae isua.

² Idau iyoŋ akitamaranikin akwap; idau iyoŋ akitoororun akwap; togolonok tokona neni eorori, anerae ecamit aritaar.

³ Iteryamu iyoŋ ŋituŋa kon ŋican ŋulu atyonok; ikiinak iyoŋ isua akiteritero esibit ikirae ŋikamerak.

⁴ Idau iyoŋ akiwuakin emacar aŋuna a ŋulu ikitopoloorito iyoŋ, emacar ŋolo eiunotor ikes apaki ŋina a ŋinyas.

⁵ Toiunae isua, anagogoŋu kon, kiŋarakinae isua, ikotere elakunio ŋulu imina iyoŋ.

⁶ Adau Akuj akirwor ŋakiro nu anakibois keŋ a ŋina asegan ebe, “Analelyanu kaŋ, atyakatyakae ayoŋ Sekem, ido okora akadipaalat ŋina a Sukos.

⁷ Erae Gilead ŋina kaŋ, erae Manase ŋina kaŋ; erae Epuraim ekabila ŋolo iretakini ŋimoe alotuŋa kaŋ, ido erae Yudaya ekabila ŋolo ipukae ŋituŋa kaŋ.

⁸ Erae Moab akwap ŋina erae akoŋinait aneni a ŋituŋa kaŋ, ayoŋ epukat akwap a Edom. Aceluni ayoŋ aŋuna elounia ayoŋ akwap a Pilistia.”

⁹ Ŋae akayai ayoŋ lotaun ŋolo eya ŋaduketa ŋunajiet? Ŋae akarikori ayoŋ Edom?

¹⁰ Nyeŋero mono iyoŋ isua, okoe Akuj a? Okoe Akuj nyeriŋa iyoŋ irukonorete lojie ka ŋasigarya kosi.

¹¹ Kiŋarakinae isua anakitijiore ŋimoe kosi, anerae erae akiŋarakinet a ŋituŋa akoŋinait.

¹² Anarukit ka Akuj, ikiji isua ikidedeŋ nooi, erae Akuj iŋes ilouni ŋimoe kosi.