Ŋikiru. 59 - Ebaibul

Akilip aŋuna ka alakuno alomoe (Ekiruk a Daudi neni a ŋolo apolokinit aeore, eruko Daudi iŋes apaki ŋina alimokinia Saul ŋituŋa akidap Daudi alokai ikotere earete ikes Daudi)

¹ Okoe Akuj kaŋ, tolakunae ayoŋ alomoe kaŋ; kiyokoi ayoŋ aneni a ŋulu akaremokino.

² Tolakunae ayoŋ aneni a ŋulu itiyaete aronis toiunae ayoŋ aneni a ŋulu ebobokinit akiar ŋituŋa.

³ Kiŋolik iyok epite ŋolo idasitotor akadapito ayoŋ! Okoe Ekapolon ariwo ŋituŋa ŋulu adedeŋak ekemanito ayoŋ, tomam bo ŋuna aronok ŋuna etiyat ayoŋ, kori asecit.

⁴ Emam ŋuna adyekarit ayoŋ, nai etenito ikes akisiryakin ayoŋ. Bua Ekapolon ikiŋarak ayoŋ; kiŋolik epite ŋolo aryamunitor ayoŋ ŋican.

⁵ Okoe Ekapolon Akuj ŋina Etiron, Akuj a Isirael, bua kisican ŋakwapin daadaŋ, nyitoodik akisyon adio neni a ŋulu aronok a ŋulu etukete akitiya aronis.

⁶ Eboŋuneneete ikes eboŋ, ikomosi ikwa ŋiŋokwo, ido irimito etaun

⁷ Kiira iyoŋ epite ŋolo iorooto ikes, irworosi ŋakiro ŋuna apipilak, etamete ikes atemar kori emam ituŋanan epupi ŋakiro kec.

⁸ Nai okoe Ekapolon ijamuwarit iyoŋ ŋakiro kec; ijamuwarit iyoŋ ŋituŋa a ŋakwapin a daadaŋ ŋulu nyenupito neni kon.

⁹ Okoe Akuj agogoŋu kaŋ, ekekinyomit ayoŋ iyoŋ; anerae iyoŋ okoe Akuj, irae aduketait kaŋ ŋinajiet.

¹⁰ Ebuni neni kaŋ Akuj kaŋ anamina keŋ a ŋina nyiryaŋiryaŋa aiun ayoŋ, ekesiŋolikini iŋes ayoŋ ŋimoe kaŋ ebwaŋio.

¹¹ Nyiar ikes Akuj, anerae acepaki ejoŋoete ŋituŋa kaŋ atamunit epite ŋolo isicania iyoŋ ikes; anapedor kon, kimyek ikes kirimo akwap, ido kituruwo ikes ŋicaryo, okoe Ekapolon ekeyokon kosi.

¹² Aŋuna ka asecit a ŋina ke erwor kec ka aŋuna a ŋakiro aŋuna irworosi ikes, kimyek ikes kikamunae aŋuna ka akituro kec. aŋuna a ŋicen kec ka alyokonu ŋina irworosi ikes,

¹³ tomunya ikes anaŋoit kon tomunya ikes todaun tari ipei daŋ ikotere toyenut ŋituŋa daadaŋ atemar Akuj ipukat ŋituŋa a akwap a daadaŋ.

¹⁴ Eboŋuneneete ikes eboŋ ikomosi ikwa ŋiŋokwo, ido irimito etaun.

¹⁵ Irimito ikes iwarito akimuj, ido iŋuruŋurasi erae pa kimwokito.

¹⁶ Nai aeikini ayoŋ etojokit agogoŋu kon, aeikini ayoŋ a ŋinataparacu nooi etojokit amina kon ŋina nyiryaŋiryaŋa; anerae irae iyoŋ aduketait kaŋ ŋinajiet, neni kon aiunor ayoŋ anapakio a ŋuna a ŋican.

¹⁷ Okoe Akuj agogoŋu kaŋ, aeikini ayoŋ eete ŋolo ka akipuro iyoŋ, anerae iyoŋ okoe Akuj, irae aduketait kaŋ ŋinajiet, Akuj kaŋ ŋina eketoodikinit ayoŋ amina keŋ ŋina nyiryaŋiryaŋa.