Ŋikiru. 58 - Ebaibul

Akilip neni ka Akuj kisican ŋulu aronok (Ekiruk a Daudi neni a ŋolo apolokinit aeore)

¹ Irworosi mono kire iyes ŋikepukak ŋakiro ŋuna iyookino a? Itubonokinete mono kire iyes ŋituŋa anakiyookino a?

² Mam, itamete iyes alotai kus akitiya ŋuna nyiyookino. Itiyaete ŋakan kus ŋakiro ŋuna ka aryenyeo anakwap.

³ Ibatanarosi ŋulu aronok eriŋa epotiyo edyakanarete ikes ŋinapei idounere, elyokoko.

⁴ Ileleba neni kec akisorit ŋina ikoni ŋina a akipom, egolol ŋaki kec ikote ŋuna a akipom,

⁵ a ŋina nyepupi ŋitoilon a ŋimurok a ŋulu enyaraeneneete ŋimuno. kori ŋieosyo a ŋimurok a ŋulu aosok.

⁶ Okoe Akuj, topokono ŋikyal anakituka a ŋituŋa a ŋul; Okoe Ekapolon, todotono ŋikyal a ŋimoe; a ŋulu ikote ededeŋ ŋiŋatunyo a ŋul.

⁷ Kimyek ikes todaunos ikwa ŋakipi ŋuna elelearete nariet; kimyek ikes kikwaanikinos ka ŋinya ŋulu ipudaaryo a lorot tookiyosi.

⁸ Kimyek ikes topuripuryaar ikwa ecelit ŋolo elomari kai keŋ; kimyek ikes kikokis ikoku ŋini idounitoe eriŋa apaki keŋ, ŋini nyepedori aŋaar ŋakonyen.

⁹ Ani eriŋa ŋulu aronok nyeyenuna, elemaryo ikes ikwa edowan; emunyari Akuj ikes anaŋoit keŋ a ŋina aryenyaanan. Epyaari Akuj ikes eriŋa esorokoka elelakinito akitiya aronis.

¹⁰ Elakarosi ŋulu iyookino apaki ŋina iŋolikiniata ŋulu aronok emunyaryo; icakulaete ikes a ŋakejen ŋaokot a ŋulu aronok.

¹¹ Etemarete ŋituŋa, “Kire jik, eyai eropit a ŋulu iyookino; kire jik, eyai Akuj ŋina etubi ŋakiro anakwap.”