Ŋikiru. 57 - Ebaibul

Akipuro ka ayenut atemar ekeŋarakinio alorwa a ŋulu ka akisicanio

(Ekiruk a Daudi neni a ŋolo apolokinit aeore, eruko Daudi iŋes apaki ŋina aemya anaturukan aŋuna a Saul.)

¹ Okoe Akuj kisyonitetei ayoŋ, kisyonitetei ayoŋ, anerae neni kon iŋes aiunia ayoŋ akiyar kaŋ; akitodol ŋina edaunotor ŋinyas.

² Egworonokini ayoŋ Akuj ŋina alokidiama nooi, Akuj ŋina erae iŋes isiyoonokini acamit keŋ aŋuna kaŋ.

³ Eboŋokini iŋes ŋakiro kaŋ anakuj, ido okoiu ayoŋ, isurumi iŋes ŋileec ŋulu ekesicanito ayoŋ. Iyakuuni Akuj neni kaŋ amina keŋ ŋina nyiryaŋiryaŋa ka akikinyoma keŋ.

⁴ Ayai ayoŋ kidiŋ ŋiŋatunyo; ŋiŋatunyo ŋulu anyamak ŋituŋa; ekwaka ŋikyal kec ikote ŋakwaaras ka ŋikaleŋeleŋe ekwaka ŋaŋajepa kec ikote ŋileŋia.

⁵ Okoe Akuj, emaikina kipuroe ekiro kon alokidiama nakuj kimyek apolou kon min nakwap daadaŋ.

⁶ Adaut ikes akiwuakin atibait aŋuna ka akisurumya ayoŋ; eyaloloŋiyo ayoŋ. Adaut ikes abokakin akipany lorot kaŋ, nai emasakin ikes pei nakipany ŋin.

⁷ Okoe Akuj, nyiryaŋiryaŋa etau kaŋ, nyiryaŋiryaŋa etau kaŋ, aeikini ayoŋ ekepuro iyoŋ.

⁸ Akyenyuni ayoŋ oramak agita ka aduŋgu akyenyuni ayoŋ eriŋa kide nyereŋuna.

⁹ Alakar ayoŋ neni kon, okoe Ekapolon alokidiŋ ŋituŋa a ŋakwapin; aeikini ayoŋ ŋieosyo ŋulu ka akipuro neni kon alokidiŋ ŋituŋa a ŋakwapin,

¹⁰ anerae epol nooi amina kon ŋina nyiryaŋiryaŋa, edolit tari kidiama; edolit akikinyoma kon tari lodouwon.

¹¹ Okoe Akuj, emaikina kipuroe ekiro kon alokidiama nakuj; kimyek apolou kon min nakwap daadaŋ.