Ŋikiru. 56 - Ebaibul

Kikinyom Akuj anapakio aŋuna ka akisicanio (Ekiruk a Daudi neni a ŋolo apolokinit aeore, eruko Daudi iŋes apaki ŋina ekamuniata Ŋipilistin iŋes alo Gas.)

¹ Okoe Akuj, kisyonitetei ayoŋ, anerae ekesicanito ayoŋ ŋituŋa; ekesicanito ayoŋ ŋimoe apaaran jwii.

² Ekesicanito ayoŋ ŋimoe kaŋ apaaran jwii; okoe Ekapolon ŋolo alokidiama nooi, elalak ŋituŋa ŋulu eketijiete ayoŋ.

³ Ani apaki ŋina akabuli ayoŋ, ekekinyomi ayoŋ iyoŋ.

⁴ Epuro ayoŋ Akuj aŋuna a akiikinet keŋ. ekinyomit ayoŋ Akuj; mam ŋuna eketubulete. Anukiro epedori ituŋanan akitiya neni kaŋ?

⁵ Itoroniarito ikes ŋakiro kaŋ apaaran jwii; etamete ikes jwi jwi epite ŋolo akawaniata ayoŋ.

⁶ Etukosi ikes aremokin ayoŋ, eŋopito, itete neni etori ayoŋ, ecamito nooi alemar akiyar kaŋ.

⁷ Okoe Akuj, kisican ikes aŋuna ka aronis kec; okoe Akuj ananyunyura kon, kilou ŋituŋa ŋul.

⁸ Iyeni iyoŋ epite ŋolo ekelolikinitere ayoŋ; iyeni iyoŋ etyae ŋolo a ŋakiyo kaŋ, emam mono ikes alokitaabo kon a?

⁹ Eboŋorete nai ŋimoe kaŋ akoloŋit ŋina akanyaraa ayoŋ iyoŋ. Ayeni ayoŋ atemar itiyakin ŋun, anerae ikirukit ayoŋ ka iyoŋ.

¹⁰ Ekinyomit ayoŋ Akuj ŋina epuro a akiikinet keŋ, ekinyomit ayoŋ Ekapolon ŋolo epuro a akiikinet keŋ,

¹¹ ekinyomit ayoŋ Akuj; mam ŋuna eketubulete. Anukiro epedori ituŋanan akitiya neni kaŋ?

¹² Okoe Akuj, emaikina ayoŋ etiya ŋuna ekoŋit neni kon; ayauni ayoŋ ŋainakineta ŋuna ka alakara neni kon,

¹³ anerae ilaku iyoŋ akiyar kaŋ anatwanare, nyimyekina iyoŋ ayoŋ ekelounio. ikotere ayoŋ alosi alokiŋaren kon; Akuj anakica a ŋin ecaikinit ŋulu eyarete.