Ŋikiru. 52 - Ebaibul

Atubokino a ŋulu alyokonok (Ekiruk a Daudi neni a ŋolo apolokinit ŋaeosyo, eruko Daudi iŋes apaki ŋina alosyo Doeg Edomit neni a Saul, alimokin iŋes atemar abu Daudi kai ka Aimelek.)

¹ Kaanukiro ituror iyoŋ aŋuna ka aronis, iyoŋ ekile lo ŋolo igogoŋ akilo? Erae Akuj ŋina esyonion ŋikaru ka ŋikaru.

² Ituki iyoŋ ŋakiro ŋuna ka amunyar ŋuluce; ikwaan ŋakiro kon ka ebanyet ŋolo ipenitae ejok, itamatamae akitiya ŋuna aronok bon.

³ Imina iyoŋ aronis nooi akilo ajokis, imina iyoŋ alyokonu nooi akilo akirworo ŋuna a kire.

⁴ Imina iyoŋ ŋakiro daadaŋ ŋuna etoŋaak, okoe iyoŋ ŋolo irworo amodiyo!

⁵ Aŋakiro a ŋun, ikimunyari iyoŋ Akuj jik, ikikopori Akuj iyoŋ ikilema alore kon; ikilemari iŋes iyoŋ anakwap a ŋulu eyarete.

⁶ Iŋolikinete ŋulu iyookino ŋakiro ŋun, ido tobul; ikikyenatar iyoŋ ŋulu itiyaete aronis ebasi,

⁷ “Kiŋolikisi ituŋanan ŋini abu nyikinyom neni ka Akuj, nai abu kikinyom ebari keŋ ŋolo alalan, ido abu iŋes tobarak nakiar ŋuluce.”

⁸ Nai aiuna ayoŋ alo Kai; ka Akuj ekoni ekitoe ŋolo ka Olipa ŋolo erubi ejok; ekinyomit ayoŋ amina ka Akuj ŋina nyiryaŋiryaŋa ŋikaru ka ŋikaru.

⁹ Alakar ayoŋ neni kon Akuj ŋikaru ka ŋikaru, aŋuna a ŋakiro a ŋuna itiya iyoŋ. Ekepuri ayoŋ iyoŋ aneni ilipyata ŋituŋa.