Ŋikiru. 50 - Ebaibul

Akilip ŋina ecamunit Akuj (Ekiruk ŋolo ka Asap)

¹ Akuj Ekapolon ŋolo etiron, iŋes irworo enyarit akwap daadaŋ ŋinapei alo Kide tari To.

² Ecai Akuj alo Sion, alotaun a ŋolo ibus nooi.

³ Ebunit Akuj yok, ido nyililiŋi iŋes; eyai akim kiŋaren keŋ ŋina enyamuwari ŋinibore, eyai ekuwuam nawaetin keŋ ŋolo ekusi nooi.

⁴ Enyarit iŋes nakuj ka akwap, kiŋolikisi epite ŋolo etubio iŋes ŋakiro a ŋituŋa keŋ.

⁵ Irworo iŋes ebala, “Tocunutu neni kaŋ ŋituŋa kaŋ ŋulu seuna, ŋulu apotu ocamunos ka ayoŋ anamuronot a ŋina aponi kitiyae.”

⁶ Elimorit nakuj akiyookino ka Akuj ka atemar Akuj alope erae akatubon ŋakiro.

⁷ “Topupokisi, okoe ŋituŋa kaŋ, ido erworikini ayoŋ. Okoe Ŋisirael, alimuni ayoŋ ŋakiro ŋuna eketoroniyaritor iyes. Arae ayoŋ Akuj, Akuj kus.

⁸ Meere aŋuna a ŋamuronisya kus eketoŋoitor ayoŋ iyes, kori aŋuna a ŋainakineta kus a ŋuna epeyo a ŋuna iyaunenete iyes kiŋaren kaŋ jwi jwi.

⁹ Emam ŋimoŋin eitanit ayoŋ alosipanin kus, kori ŋikorwa eitanit ayoŋ alosipanin kus;

¹⁰ anerae erae ŋityaŋ daadaŋ ŋulu ka ariet ŋulu kaŋ, ido erae ŋaatuk daadaŋ ŋuna eyakasi; lokamukumukui tari ŋalipyo ŋuna kaŋ.

¹¹ Erae ŋikeny daadaŋ ŋulu kaŋ; erae ŋisubuna daadaŋ ŋulu ka ariet ŋulu kaŋ.

¹² Ani kerae okonyamite ayoŋ akoro, pa kekeŋit ayoŋ iyes ainakin ayoŋ akimuj; anerae erae akwap ŋina kaŋ ka ibore daadaŋ ŋini eyai nakwap erae ŋini kaŋ.

¹³ Anyamenene mono ayoŋ akiriŋ a ŋimoŋin, kori amasenene ŋaokot a ŋikorwa a?

¹⁴ Inakisi Akuj ŋamuronisya ŋuna ka alakara neni keŋ, ido kisiyookisi ŋuna ipotu iyes kikoŋo neni ka Akuj a ŋina alokidiama nooi.

¹⁵ Tonyarae ayoŋ anapakio a ŋuna a ŋican; akaiuni ayoŋ iyes, ido ikitopoloorete iyes ayoŋ.”

¹⁶ Nai iŋisit Akuj ŋituŋa ŋulu aronok ebe, “Kaanukiro ieotor iyes ŋakiciketa kaŋ, kori irworotor ŋakiro ŋuna ka acamunet kaŋ?

¹⁷ Toŋerito bo ŋakiro ŋuna abala ayoŋ kiwuapa, ido ikoŋete imanete ŋakan kaku iŋerito ŋakiro kaŋ.

¹⁸ Ikoneununeete iyes ŋikokolak apaki ŋina iŋolikiniata edio, ido iminasi arukit ka ŋikalomak.

¹⁹ “Irworosi iyes ŋakiro ŋuna aronok, ido itanaikis ŋaŋajepa kus akirworo alyokonu.

²⁰ Irworosi iyes a ŋinapaki itoroniarito ŋiyeneta kus, ido iswomatar ŋikaitotoi kus.

²¹ Idaut iyes akitiya ŋakiro ŋun, ido eliliŋi ayoŋ cek; itamete iyes atemar kori ekoni ayoŋ iyes. Nai tokona ekeyeyakini ayoŋ iyes, ido akalimokini tokona ŋuna ekesitakinitor.

²² “Totamatamata ŋakiro ŋun, iyes idaut ajamuwar ayoŋ, ani kemam, akamunyari ayoŋ iyes, emam ituŋanan ikiuni.

²³ Eketopoloorito ayoŋ ŋituŋa ŋulu eponeneete alakara neni kaŋ ituruworito alakara kec amuronot neni kaŋ; ikes ŋulu iwuapito ŋakiro ŋuna ka akiyookino, etoodikini ayoŋ ikes aiuno kaŋ.”