Ŋikiru. 49 - Ebaibul

Abaŋao ŋina ka akikinyomit ebari (Ekiruk a Ŋikoraitin neni a ŋolo apolokinit aeore)

¹ Kiirasi ŋakiro nu iyes ŋituŋa daadaŋ, topupokisi iyes daadaŋ ŋulu iboiyete anakwap,

² iyes ŋulucaryo ka ŋikapolok ta iyes ŋikabarak ka ŋikulyak kaapei.

³ Alimuni ayoŋ ŋakiro ŋuna ikiinakinete aosou; eruwor ŋakiro ŋuna atami ayoŋ alotau kaŋ ŋuna ikiinakinete ayenun.

⁴ Apupokini ayoŋ ŋakitadapeta, esileereu apolou kec arami agita.

⁵ Kaanukiro akuryaniaror ayoŋ anapakio a ŋuna a ŋican, apaki ŋina ekerikauniata ayoŋ ŋimoe

⁶ ŋulu ikinyomito ebari kec, ido kituros aŋuna ka alalau ke ebari kec?

⁷ Emam ituŋanan elakuni ituŋanan ŋinice a akiyar keŋ, emam ibore einakini ituŋanan Akuj aŋuna ka alakun akiyar keŋ,

⁸ anerae epol nooi ibore ŋini elakunere akiyar a ituŋanan, ido emam ibore itemokin jik ataca akiyar,

⁹ torubakinia ituŋanan iboi ŋikaru ka ŋikaru nyetwana.

¹⁰ Iteete ŋituŋa daadaŋ tari ŋikaosok etwakete; ŋibaŋaanotin daŋ ka ŋulu imatimataarit etwakete, ido imyaanakinete ebari kec kiruma ŋuluce.

¹¹ Erae ŋalyalin kec neni iboiyoto ikes ŋikaru ka ŋikaru, erae neni iboiyoto ikes ŋanyameta daadaŋ, tari daŋ keyakatar sek ikes arwonu anakwap.

¹² Nai tari kebarit ituŋanan ikwa ai, nyiboi ŋikaru ka ŋikaru; etwani iŋes lopite ŋolopei etwakyata ŋityaŋ.

¹³ Ŋakiro ŋun ikes eryamunete ŋituŋa ŋulu ikinyoma make ka ŋulu enupito ŋakiro ŋuna irworosi ŋituŋa ŋul.

¹⁴ Elomarete ikes nakibois a ŋikatwak, lopite ŋolo elomaryata ŋamesekin nakibois ŋina eŋolere, ido etwakete ikes. elomarete ikes kwap, meere iwace, eŋopiyarete ŋasima kec; eruwor akibois a ŋikatwak ŋina kec.

¹⁵ Nai elakuni Akuj akiyar kaŋ anapedor a ŋina ka atwanare; anerae akayai iŋes ayoŋ neni eyai iŋes.

¹⁶ Nyirakaaketa iŋolikinete ŋituŋa ebarete, apaki ŋina iatakinor ebari alokalya kec;

¹⁷ anerae apaki ŋina etwakyata ikes, emam ibore eyaete ipei daŋ, nyerukorete ikes ke ebari kec kwap.

¹⁸ Tari ŋina aponiata ŋituŋa ŋul eriŋa eyarete kirworo atemar ŋulu ikirereŋ, ido apotu ŋituŋa kipuro ikes aŋuna alosyo akiyar kec ejok,

¹⁹ elosete ikes akimorikin ka atapapaa kec, ŋulu emam nabo jik nyiŋolikinete akica.

²⁰ Nyiboi ituŋanan ŋikaru ka ŋikaru, etwani iŋes lopite ŋolopei etwakyata ŋityaŋ.