Ŋikiru. 46 - Ebaibul

Akiuryarit ka Akuj etaun keŋ ka ŋituŋa keŋ (Eete ŋolo a Ŋikoraitin neni a ŋolo apolokinit aeore)

¹ Akuj iŋes erae akaiunan ka agogoŋu yok, akeŋarakinan anapakio a daadaŋ a ŋuna a ŋican.

² Aŋun, emam ibore ikitubuli iwon, tari daŋ kemaraniki akwap; kimasar ŋimoru nenicukul ananamyo;

³ tari daŋ kerwoto ŋakipi a ŋanamyo tokwoto ŋikurudoi, tari daŋ kemarana ŋimoru aŋuna ke eruye a ŋanamyo.

⁴ Eyai aŋolol ŋina eyaunit alakara lotuŋa ŋulu iboiyete alotaun a ŋolo ka Akuj, anakibois a ŋina asegan a ŋina eyai Akuj ŋina epol nooi.

⁵ Eyai Akuj tooma etaun ŋol, nyielar etaun ŋol jik, iŋarakini Akuj etaun ŋol apaki ŋina iwalarya akwap.

⁶ Ecelasi ŋakwapin, emaranete ŋapukasinei; iretununui Akuj, ido toli akwap.

⁷ Ikiya iwon ke Ekapolon ŋolo a ŋajoresyo, Akuj a Yakob iŋes erae akaiunan yok.

⁸ Potu, kiŋolikisi ŋiticisyo ŋulu ke Ekapolon; kiŋolikisi ŋakiro ŋuna ka aumokin ŋuna etiyak iŋes nakwap.

⁹ Itasalununui iŋes ŋijiesyo anakwap; ebilibili ŋakausinei a ŋikaleŋeleŋe, kimasana ŋakwaaras, ido kicuny ŋaupala.

¹⁰ Ebala Akuj, “Tojoŋoto ejie, toyenutu atemar arae ayoŋ Akuj; eketopolooritae ayoŋ anakwapin eketopolooritae ayoŋ anakwap.”

¹¹ Ikiya iwon ke Ekapolon ŋolo a ŋajoresyo, Akuj a Yakob iŋes erae akaiunan yok.