Ŋikiru. 45 - Ebaibul

Eete ŋolo ke ekiitanu a ŋirwosi (Ekiruk a Ŋikoraitin neni a ŋolo apolokinit aeore)

¹ Ileleba ŋakiro ŋuna ajokak lotau kaŋ, apaki na ŋina atamya eete aŋuna ke erwosit. Ikwaan aŋajep kaŋ eeo ejok ka akalamu ŋina ke ekegiran a ŋolo etenit.

² Ibus iyoŋ erwosit akilo ŋikilyok daadaŋ; ejokak ŋakiro ŋuna irworo iyoŋ, aŋun, adau Akuj akiterereŋ iyoŋ ŋikaru ka ŋikaru.

³ Toenik ekileŋ kon losyepi kon erwosit ŋolo etiron irae iyoŋ erwosit ŋolo iyakar apolou ka ailiil.

⁴ Alotooma ailiil kon tome aŋole irae ŋolo elounan, aŋuna ka akitogogoŋ ŋuna a kire ka akitub ŋakiro anakiyookino; irae iyoŋ erwosit ŋolo igogoŋ ka itiyae ŋiticisyo ŋulu ka aumokin.

⁵ Ekwaka ŋikaleŋeleŋe kon ememeete ŋimoe kon lotai; ireuni iyoŋ ŋimoe kon.

⁶ Eropari apukan kon, okoe Akuj ŋikaru ka ŋikaru; ipukat iyoŋ ŋituŋa kon anakiyookino.

⁷ Imina iyoŋ ŋuna iyookino ka iŋerit ŋuna aronok, ŋakiro ŋun iŋes abunio Akuj ŋina erae Akuj kon itoseunia iyoŋ, ido ikiinak iyoŋ alakara ŋina iloit ŋina eyakar, erwosit ece.

⁸ Eyai lokaasoi kon daadaŋ eure ŋolo akukunyon, eure ŋolo a eminae a ŋolo akukunyon ka ŋolo ka akimyet a ŋina akukunyon ta ŋolo a ekitoe a ŋolo enyaritae Kasia. Ilakara iyoŋ aŋuna a ŋieosyo a ŋulu eeoi eramyo ŋiboro ŋulu a ŋiunoi anakais ka apukan a ŋuna isibusitae a ŋikyal a ŋitome.

⁹ Ŋidwe a ŋirwosi ŋulupesur, ikes ŋaberu ŋace ŋuna itopolooritae alokai ka apukan; ewoi aloteten kon ateran ŋina erae akapolon, enapit asir ŋina ke egolid a ŋolo eyaunitae alo Opir.

¹⁰ Topupok okoe ateran, totamatama ido kiira; kimyek ikimuriakis ŋuna a ŋituŋa kon ka ekal a papa kon,

¹¹ ikotere nai enirari erwosit akibuses kon. Aŋuna eraakar iŋes ekapolon kon, emaikina iyoŋ kitopoloorite iŋes.

¹² Iwarete ŋituŋa a Tiro ajokis kon, yaut neni kon ŋainakineta; iwarete ŋikabarak anakwap ajokyar aneni kon.

¹³ Elomunit ateran a erwosit kai ka apukan nooi neni ebusan; edonyonokinitoe lolowi keŋ ŋulu aoyak ŋausyo ŋuna ke egolid.

¹⁴ Itenanaryo iŋes neni ke erwosit enapit ŋilowi ŋulu esiritoe; iwuapito ŋapesur ŋuna iŋarakinito iŋes.

¹⁵ Elosete ikes elelyanete ka elakara, apaki ŋina elomareta kai ŋina ka apukan.

¹⁶ Ipukaete ŋidwe kon ŋulusapa erwosit ilunyokin neni atapapa kon kipukata; ituruwori iyoŋ ikes ŋirwosi a daadaŋ.

¹⁷ Eketurubakini ayoŋ iyoŋ aloete a lo ikitamunitae ananyameta a daadaŋ; aŋun, ikipurete iyoŋ ŋituŋa ŋikaru ka ŋikaru.