Ŋikiru. 41 - Ebaibul

Akitoodikinet ŋina ka akiŋarakinet a ŋina ka Akuj ka akilip aŋuna ka aŋaleun (Ekiruk a Daudi neni a ŋolo apolokinit aeore)

¹ Erereŋ ŋituŋa ŋulu iŋarakinito ŋikulyak; elakuni Ekapolon ikes anapakio a ŋuna a ŋican.

² Iuryarit Ekapolon ikes ka iyoki ikes; eruworosi ikes ŋulu erereŋ anakwap. Nyipotokini Ekapolon ikes napedor a ŋimoe kec.

³ Iŋarakini Ekapolon ikes apaki ŋina edyakakinotor itaŋaleuni Ekapolon ikes alodekesyo kec a daadaŋ.

⁴ Ani eruwor ayoŋ, abu otema, “Okoe ekapolon, torimakinae ayoŋ; kitaŋaleunoe ayoŋ, anerae asec ayoŋ aneni kon.”

⁵ Irworosi ŋimoe kaŋ ŋuna aronok aŋuna kaŋ ebasi, “Ori mono etwania iŋes tojoŋoi atamunit iŋes jik.”

⁶ Ani apaki ŋina eponiata ikes aanyun ayoŋ, irworosi ŋakiro ŋuna emam apolou, ido iricito ikes alotai kec ŋakiro ŋuna aronok bon; ani elosete aneni kaŋ tolimokis ŋituŋa ŋuluce.

⁷ Ekeŋaiŋaatar ayoŋ daadaŋ ŋulu akaremokino; etamete atemar kitiyakin neni kaŋ ŋuna aronok nooi.

⁸ Ebasi ikes “Adyakakin iŋes edeke ŋolo aaran, nyepedori nabo iŋes anyoun aneni eperyo.”

⁹ Tari lokone kaŋ ŋolo amina ayoŋ nooi, ŋolo ekinyomit ayoŋ nooi, ŋolo abu omora ka ayoŋ akimuj, akaluki ayoŋ.

¹⁰ Nai okoe Ekapolon, kisyoni ayoŋ, kitaŋaleunoe ayoŋ, ikotere enyaŋa ŋuna etiyata ikes neni kaŋ.

¹¹ Ayenuni ayoŋ atemar ilakara iyoŋ aŋuna kaŋ, anerae nyilouna ŋimoe kaŋ ayoŋ.

¹² Ikiŋarakinit iyoŋ ayoŋ aŋuna ka akiyookino kaŋ, ikiwuakinit iyoŋ ayoŋ ŋikaru ŋikaru neni ilipyata ŋituŋa.

¹³ Akipuro toyai neni ke Ekapolon, Akuj ŋina a Isirael, akipuro toyai neni keŋ tokona ka ŋikaru ka ŋikaru. Amen! Amen!