Ŋikiru. 39 - Ebaibul

Akilip aŋuna ka aosou ka akisyonio (Ekiruk a Daudi neni a ŋolo apolokinit aeore)

¹ Abu ayoŋ olimu ebe, “Acoikini ayoŋ alotooma ŋuna etiyae, ikotere nyasec alotooma ŋuna erworo; nyalimuni ayoŋ ŋakiro ŋadi eapiyete ŋituŋa ŋulu aronok.”

² Abu ayoŋ eliliŋ cek nyalimu ŋakiro ŋadi, nyelimuno ŋakiro ŋadi tari ŋuna ajokak; nai apotu ŋican kaŋ kiyatakin nooi.

³ Abu etau kaŋ tonyunyurikin nooi, ani alomari ayoŋ atamatam, abu aryeba kaŋ kiyatakin nooi, abu nai erworik otema,

⁴ “Okoe Ekapolon, tolimokinae ayoŋ akoloŋit ŋina atwania ayoŋ, ka ekimar ŋolo a ŋirwa akiyar kaŋ, kimyekinae ayoŋ oyenu auruwuanut ŋina a ŋirwa a ŋulu ka akiyar kaŋ.”

⁵ Idau iyoŋ akitoodikin ayoŋ auruwuanut ŋina a ŋirwa a ŋulu ka akiyar kaŋ, ido aruwor ŋirwa ŋulu ka akiyar kaŋ ŋicaryo alokiŋaren kon. kire jik, ikoni ituŋanan daadaŋ ekuwuam koŋin.

⁶ Kire jik, ikoni ituŋanan daadaŋ elosi etolim. Kire jik, eŋirikinito ŋituŋa akitiya koŋin; iriraete ikes ebari nai nyeyenete atemar eruwor ŋolo a ŋae.

⁷ “Nai tokona, Okoe Ekapolon, nyo eriŋa ayoŋ edarit? Neni kon iŋes eyai akigenokaŋ.

⁸ Tolakunae ayoŋ anasecisya kaŋ a daadaŋ; nyikimyek ayoŋ akakyenatar ŋibaŋaanotin.

⁹ Eliliŋi ayoŋ; mam ŋakiro alimuni, anerae iyoŋ idau akiteryamun ayoŋ ŋican ŋul.

¹⁰ Tolema akisicanet kon aneni kaŋ; eketapapanu ayoŋ akisicanet kon.”

¹¹ “Iŋenyakini ka isicani iyoŋ ŋituŋa aŋuna ka asecit kec; itadaununi iyoŋ ebari kec ikwa itodaunia esipiran akimuj, kire jik erae ituŋanan daadaŋ icaryoit, ekuwuam koŋin.

¹² Kiira akilip kaŋ okoe Ekapolon, topupok akigworo kaŋ, ido ikiŋarak, nyiwou akiirar akigworo kaŋ, anerae ikirukit ayoŋ ka iyoŋ arae ekaloton, arae ayoŋ egelaanot lopite ŋolo araakatar atapapaa kaŋ daadaŋ ŋigelaanotin.

¹³ Kimyekinae ayoŋ bon, ikotere oryamu alelyanu adio eriŋa ayoŋ nyetwana, ido nyatakanu nabo jik.”