Ŋikiru. 38 - Ebaibul

Akilip a ekakiwan aŋuna ka akitaŋaleuno anaryeba (Ekiruk a Daudi aŋuna ka ainakinet a ŋina etamunitere ŋulu alunyar)

¹ Okoe Ekapolon, nyikiŋenyak ayoŋ anaŋoit kon, kori nyikisican ayoŋ ananyunyura kon,

² anerae akawana ayoŋ ŋikaleŋeleŋe kon, ikitiŋ iyoŋ ayoŋ neni aronon.

³ Aŋuna ka anyunyura kon aryeba ayoŋ nooi; aŋuna ka asecit kaŋ adyakakin akuwan kaŋ.

⁴ Ekeloŋiyasi ayoŋ ŋasecisya kaŋ, ekwaanikin ikes ka egogos ŋolo apotyon, ŋolo nyapedori akidaŋidaŋ.

⁵ Abosa ŋajemei kaŋ, aruwor etoku, aŋuna ka asecit kaŋ a ŋina ka abaŋao.

⁶ Epol aryeba kaŋ nooi nyapedori ayoŋ anyoun, apaaran jwii egworo ayoŋ.

⁷ Elelebun aryeba ŋina apipilan nooi nakuwan kaŋ; adaun aŋaleu anakuwan kaŋ.

⁸ Alemun ayoŋ ka alilimiyo akuwan kaŋ nooi; aumeni ayoŋ aŋuna ka aryeba a etau.

⁹ Okoe Ekapolon ileerete ŋuna acamit ayoŋ daadaŋ alokiŋaren kon, ikipupi iyoŋ ayoŋ aumeni.

¹⁰ Ipuna etau kaŋ, adaun agogoŋu kaŋ; emucakis tari ŋakonyen kaŋ amuumu.

¹¹ Akaŋero ayoŋ ŋikonei ka ŋirukitos kaŋ aŋuna a ŋajemei kaŋ, eboiyosi ŋikidunyet kaŋ neni alwanan aneni kaŋ.

¹² Akalokunito ayoŋ ŋulu iwarito akiar ayoŋ; irworosi ŋulu iwarito akiwan ayoŋ ŋakiro ŋuna akamunaarete ayoŋ, ido etukete apaaran jwi akiar ayoŋ.

¹³ Nai ikikwaan tokona ayoŋ ka ekiŋim, emam ŋuna apupi ayoŋ; ikikwaan tokona ayoŋ ka ŋini nyepupo irworo, nyepedorit alimun ŋakiro,

¹⁴ ikikwaanikin ayoŋ ka ituŋanan; ŋini nyepedorit akiirar ŋakiro, ŋini emam ŋakiro eboŋokini.

¹⁵ Okoe Ekapolon ekekinyomit ayoŋ iyoŋ; Okoe Ekapolon Akuj kaŋ, iirari iyoŋ ŋakiro kaŋ,

¹⁶ anerae elipa ayoŋ ebe, “Nyicamak ŋimoe kaŋ akakyenatar ayoŋ, kori tolelyana apaki ŋina asecia ayoŋ.”

¹⁷ Eyapi ayoŋ akimasar, ido erubakinit aryeba eyai neni kaŋ.

¹⁸ Alimori ayoŋ aronis kaŋ; aki ayoŋ asecit kaŋ.

¹⁹ Egogoŋ nooi ŋulu erae ŋimoe kaŋ koŋin, elalak nooi ŋulu akaremokino ayoŋ, emam ŋuna aronok ŋuna etiyat.

²⁰ Ikes ŋulu itiyaete ŋuna aronok neni kaŋ; etiyate bo ayoŋ ŋuna ajokak neni kec, akaremokino ayoŋ, anerae ewuapit ayoŋ ŋuna ajokak.

²¹ Okoe Ekapolon nyikiesik ayoŋ; Okoe Akuj kaŋ, nyieka aneni kaŋ;

²² Kiwonyu atipei ikiŋarak ayoŋ, okoe Ekapolon ŋolo irae ekaiunan kaŋ!