Ŋikiru. 36 - Ebaibul

Aronis a ituŋanan ka ajokis ŋina ka Akuj (Ekiruk a Daudi a eketiyan ke Ekapolon neni a ŋolo apolokinit aeore)

¹ Ani eseci ituŋanan, eyenuni alotau keŋ ŋuna itiyakini asecit neni keŋ; emam akitopoloorit Akuj anakiyar a ituŋanan a ŋin.

² Emina ituŋanan ŋini ikoni ŋin akirworo itojoka bon, Itojoka iŋes nooi nyepedori ayenun asecit keŋ, kori akiŋer asecit keŋ.

³ Ŋakiro ŋuna irworo iŋes erae ŋuna aronok ka erae amodiyo; ajoŋo iŋes akitiya ka aosou, ka akitiya ŋuna ajokak.

⁴ Etuki iŋes eriŋa eperi akitiya ŋuna aronok; ŋuna aronok bon emina iŋes akitiya nyeŋerit iŋes akitiya ŋuna aronok.

⁵ Okoe Ekapolon, eyai amina kon ŋina nyiryaŋiryaŋa, eyai akikinyoma kon kidiama.

⁶ Ikwaan akiyookino kon itiirae ka ŋimoru ŋulu itiiraete, ikwaan akiyookino kon ŋina itubio iyoŋ ŋakiro epol ka alalau a ŋakipi aloburi a ŋolo ka anam. Okoe Ekapolon iununui iyoŋ ŋituŋa ka ŋityaŋ pa ityakatyakat.

⁷ Ejok nooi amina kon ŋina nyiryaŋiryaŋa, okoe Akuj! Eryamunete ŋituŋa daadaŋ aiuno aneni kon lopite ŋolo eiunotor ŋicwi anabebenuk a toto kec.

⁸ Imujete ikes akimuj ŋina alalan ŋina iinanakini iyoŋ ikes. eryamununeete ikes ŋiboro ŋulu ajokak ŋulu iteleleunit iyoŋ lopite ŋolo eleleya aŋolol.

⁹ Neni kon eyai eitanit ŋolo ka akiyar; nakica kon iŋes ikiteo isua akica.

¹⁰ Kiturubak amina kon ŋina nyiryaŋiryaŋa eyai neni a ŋulu ikiyenete iyoŋ, ka ajokis kon eyai neni a ŋulu iyookino alotai.

¹¹ Nyicamak ŋulu akaremokino ayoŋ eketijikis ayoŋ, kori ŋulu aronok ekeritasi ayoŋ nariet.

¹² Kiŋolik epite ŋolo ileteteoto ŋulu itiyaete aronis, adaun akimasakin ikes kwap, nyepedorete anyoun.