Ŋikiru. 35 - Ebaibul

Akilip ŋina ka alakuno alomoe (Ekiruk a Daudi)

¹ Okoe Ekapolon, kitidiŋ ŋulu eketidiŋito ayoŋ; kitiji ŋulu eketijiete ayoŋ.

² Tolemu aupal kon ŋina cici ka ŋina apolon, ibu ikiŋarak ayoŋ.

³ Tolemu akwara kon kisiiryak ŋulu ekewuapito ayoŋ akiar. Kimyekinae ayoŋ oyenu atemar irae iyoŋ Ekaiunan kaŋ.

⁴ Kimyek ŋulu iwarito akiar ayoŋ tojamuwarae ka kisurumae ŋileec; kimyek ikes ŋulu akatukotor ayoŋ kitoboŋoroe ibilerit.

⁵ Kimyek ikes kielarae lopite ŋolo ielarya ekuwuam ŋamilo, kimyek emalaika kirit ikes tomunya.

⁶ Kimyek erot kec kiryoniar ka tocurutut, kimyek emalaika ŋolo ke ekapolon kiwuap ikes tomunya;

⁷ aŋuna aponiata ikes toloka ŋaunoi aŋuna kaŋ koŋin ka aŋuna aponiata ikes toboka ŋapanya aŋuna kaŋ koŋin;

⁸ kimyek amunyaro bu neni kec pa eyenete. kimyek ŋaunoi ŋuna alokito ikes kiruma ikes pei, kimyek ikes tolomasi napanya kec pei tomunyaros make.

⁹ Ebuni nai etau kaŋ alelyan a ŋakiro aŋuna etiya Ekapolon, olakar aŋuna akaiunia iŋes ayoŋ.

¹⁰ A etau kaŋ a daadaŋ, atemari ayoŋ ebe, “Okoe Ekapolon, ŋae ikwaanatar iyoŋ? Iununui iyoŋ ŋulu epalag aneni a ŋulu egogoŋ akilo ikes, iununui iyoŋ ŋulu epalag aneni a ŋulu edemanarete ikes ŋiboro kec.”

¹¹ Irworosi ŋisuudae ŋulu alyokonok eketoroniarito ayoŋ; ekesitakinito ayoŋ a ŋakiro aŋuna nyayeni.

¹² Itiyaete ikes ŋuna aronok neni kaŋ, etiyate bo ayoŋ ŋuna ajokak neni kec, akainakis ikes ayoŋ akiyaloloŋ.

¹³ Nai apaki ŋina adyakatar ikes, abu ayoŋ onap ŋilowi ŋulukigworet egwor aŋuna kec, ido abu etiditeun bon eredak akiron ka elip ejuurui,

¹⁴ esibit egworo aŋuna alokone kaŋ kori alokaato kaŋ. Abu ayoŋ erim esibit ituŋanan ŋini iwololoe aŋuna a toto kaŋ, abu ejuuru ido egworo.

¹⁵ Nai apaki ŋina ayakar ayoŋ locan, apotu ikes daadaŋ tocunakinos elakara; apotu ikes tocunakinos okokyenatar ayoŋ. Apotu ŋiryenyaanotin ŋulu pa ayeni ayoŋ torubakis ekeyanyete emam ajoŋore.

¹⁶ Apotu ikes okojamuwasi ayoŋ neni aronon esibito ŋituŋa ŋulu nyeyenete atemar eyai Akuj, apotu ikes okoryenyanikis ayoŋ ekemanito.

¹⁷ Okoe Ekapolon, apaki ŋina etya ai iyai iyoŋ ite ŋakiro ŋun nyeiuna ayoŋ? Toiunae ayoŋ anaryenyeo kec, toiu akiyar kaŋ alotuŋa a ŋulu adedeŋak ikwa ŋiŋatunyo a ŋul.

¹⁸ Abuni nai ayoŋ alakar neni kon aneni ilipyata ŋituŋa kon; ekepuri ayoŋ iyoŋ anatukot a ŋituŋa a ŋina alalan.

¹⁹ Nyicamak ŋimoe kaŋ ŋulu alyokonok akakyenatar ayoŋ, kori ŋulu akaremokino ayoŋ koŋin, akakyenatar ayoŋ ediyete ŋakonyen anakwap itopoloorito ekisil.

²⁰ Nyirworosi ikes ŋuna ka akoneo, nai etukete ŋakiro ŋuna ka amodiyo, aŋuna ka aremokinor ŋituŋa, ŋulu iboiyete anakwap itopoloorito ekisil.

²¹ Akacalanakinete ikes ayoŋ ebasi; “Ee, ee, ikiyeni isua ŋakiro ŋuna itiyae iyoŋ.”

²² Okoe Ekapolon idau iyoŋ aanyun ŋakiro kec; nyililiŋiya ŋakiro ŋun! Okoe Ekapolon, nyikiesik ayoŋ!

²³ Bua! Tonyou toiunae ayoŋ, kitepeg ikes aŋuna kaŋ, Akuj kaŋ ka Ekapolon kaŋ.

²⁴ Okoe Ekapolon Akuj kaŋ tolimo akiyookino kaŋ; nyicamak ŋimoe kaŋ akakyenatar ayoŋ.

²⁵ Nyicamak ikes etamete atemar, adaut asubakin ŋuna acamito, nyicamak ikes etamete atemar, adaut alemar amaŋe aneni kaŋ.

²⁶ Kimyek daadaŋ ŋulu akakyenatar ayoŋ alocan kaŋ kisurumae ŋileec ka ŋibiler; kimyek daadaŋ ŋulu iturosi alokiŋaren kaŋ kiruma, ŋileec ka tojoŋoi akitopoloorit.

²⁷ Kimyek ŋulu iitanito atubokino kaŋ anakiyookino tocela analelyanu ka analakara, torubakis ebasi, “Epol nooi Ekapolon, ŋolo ejoikinit ekiboiye ŋolo ajokan ŋolo a eketiyan keŋ”

²⁸ Eserae ayoŋ ŋuna ka akiyookino kon, ka ekepuri ayoŋ iyoŋ apaaran jwii.