Ŋikiru. 34 - Ebaibul

Akipuro aŋuna ka alakuno alocan (Ekiruk a Daudi apaki ŋina asibitor iŋes ituŋanan ŋini a ŋikerep, ido abu Abimelek kirita Daudi kitorotok alotaun keŋ)

¹ Epuri ayoŋ Ekapolon ŋapakio daadaŋ; arubakini ayoŋ epuro iŋes jwi jwi.

² Epuri ayoŋ Ekapolon aŋuna adau akitiya; emaikina ŋulu itiditeuna alotai kec kiirasi, ido tolelyana.

³ Olimosi kaapei ka ayoŋ apolou ŋina ke Ekapolon; epuro kaapei Ekapolon ikitopoloorit iŋes.

⁴ Abu ayoŋ elip neni a Ekapolon, ido abu okoboŋok ayoŋ; abu Ekapolon okolaku ayoŋ, aneni a ŋulu acamito akiteryamun ayoŋ ŋican.

⁵ Ikes ŋulu ikinyomito Ekapolon elelyanete nooi, mam jik ŋileec eryamunete ikes.

⁶ Abu ayoŋ alocan kaŋ ekaloik Ekapolon, ido abu Ekapolon kiira akigworo kaŋ, abu okoiu ayoŋ alocan kaŋ a daadaŋ.

⁷ Ewuaunit emalaika ke Ekapolon ŋulu itopoloorito Ekapolon. ido elakununui ikes.

⁸ Kikatakisi, iyenunete iyes atemar ejok Ekapolon, erereŋ ituŋanan ŋini elosi aiuno neni ke Ekapolon.

⁹ Kitopoloosi Ekapolon iyes ŋituŋa ŋulu ikinyomito iŋes. anerae ikes ŋulu itopoloorito iŋes, mam ibore icanasi.

¹⁰ Epedori akoro akinyam ŋiŋatunyo aŋuna icanatar ibore ŋini nyamat, nai ikes ŋulu itopoloorito Ekapolon, mam ibore ŋini ajokan ŋini icanasi.

¹¹ Potu iyes ŋulu etatami ayoŋ, topupokisi ŋakiro kaŋ; eketatami ayoŋ iyes akitopoloorit Ekapolon.

¹² Ituŋanan ŋini ecamit akiyar, ido kiitanite akiboi akaoyan ka alakara,

¹³ itemokino iŋes toesik akirworo ŋakiro ŋuna aronok ka toesik akisud ŋakiro,

¹⁴ itemokino iŋes toesik akitiya ŋuna aronok, ido kitiya ŋuna ajokak; itemokino iŋes kiwar ekisil a etau keŋ a daadaŋ.

¹⁵ Ite Ekapolon ŋulu iyookino; ka epupi Ekapolon akigworo kec aŋuna ka akiŋarakino.

¹⁶ Eremokino Ekapolon ŋulu itiyaete ŋuna aronok; ecamit alemar ikes anakwap, tojoŋoi atamunit.

¹⁷ Ani kikaloikis ŋulu iyookino Ekapolon aŋuna ka akiŋarakino; iirari Ekapolon akigworo kec, ido eiuni ikes alocan kec a daadaŋ.

¹⁸ Eapi ekapolon aneni a ŋulu amamukaun amukeo alotai, ido eiununui ŋulu amamukaun akigeno alotai.

¹⁹ Eryamununui ituŋanan ŋini iyookino ŋican ŋulu alalak, nai eiununui Ekapolon iŋes alocan a ŋul a daadaŋ.

²⁰ Iyoki Ekapolon ituŋanan ŋin emam ŋace; mam akoit keŋ apei daŋ ŋina ebilyo.

²¹ Eauni aronis atwanare neni a ŋulu aronok, ido emunyarosi ikes aŋuna ka aronis kec.

²² Elakuni Ekapolon ŋiketiyak keŋ; mam epei daŋ aneni a ŋulu eiuna aneni ke Ekapolon ŋini nyeiunio.