Ŋikiru. 32 - Ebaibul

Alelyanu aŋuna ka akisyonio (Ekiruk a Daudi)

¹ Erereŋ ŋulu adau Akuj akisyon aŋuna ka aronis kec, ŋulu ekisar ŋasecisya kec.

² Erereŋ ŋulu nyerubakinit Akuj imarit erae ŋikasecak, ŋulu emam alyokonu alotai kec.

³ Ŋinibore abunio ayoŋ eliliŋi nyalimo aronis kaŋ, abu akuwan kaŋ tolilimiyo aŋuna ka akigworo kaŋ apaaran jwii;

⁴ anerae apaaran ka akuwar ibu iyoŋ itotiŋ ayoŋ neni aronon nooi; abu agogoŋ kaŋ todaun, lopite ŋolo itadaunia amwanis ŋina ka akamu apalalu anibore.

⁵ Abu nai ayoŋ ocamu asecit kaŋ aneni kon, abu nyemunon aronis kaŋ. Abu otema “Alimori ayoŋ aronis kaŋ neni ke Ekapolon,” ido ibu iyoŋ ikisyoni ayoŋ akiilit a ŋina ka asecit kaŋ.

⁶ Aŋun, emaikina ituŋanan daadaŋ ŋini enupit neni kon kilip neni kon; anapakio a ŋuna a ŋican a ŋulu alalak nyeryamunete ikes ŋican ŋul.

⁷ Irae iyoŋ neni aŋopitor ayoŋ; ikiunit iyoŋ ayoŋ alocan; ikisirikaunit iyoŋ ayoŋ ŋituŋa ŋulu eeosi ŋieosyo ŋulu ka alelyanu aŋuna ka aiuno.

⁸ Ebala Ekapolon ebe, “Eketatami ayoŋ iyoŋ ŋipitesyo ŋulu emaikina kiwuap, Eketatami ayoŋ iyoŋ ka akalimokini epite ŋolo emaikina kitiyaa ŋun.

⁹ Nyibaŋaanar ikwa aŋole, kori aŋole-sigirya ŋuna emetae ka arukan ta auno edokitae, ani emam ŋun nyiwuapete ikes ŋuna ecamit ituŋanan.

¹⁰ Elalak ŋican a ŋituŋa a ŋulu aronok, nai emina ka eiunit Ekapolon ŋulu ikinyomito iŋes.

¹¹ Iyes ŋulu iyookino, tolakar ka tolelyana aŋuna adau Ekapolon akitiya. Iyes daadaŋ ŋulu iyookino alotai, tocela ka alelyanu.”