Ŋikiru. 31 - Ebaibul

Akilip ka akipuro Akuj aŋuna ka alakuno alomoe (Ekiruk a Daudi neni a ŋolo apolokinit aeore)

¹ Okoe Ekapolon abunit ayoŋ neni kon aryamun aiuno; nyikimyek ayoŋ ekesurumyo ŋileec; toiunae ayoŋ anakiyookino kon.

² Topupok ŋakiro kaŋ; toiunae ayoŋ atipei. Toruwor aneni kaŋ ataaba ŋina aiunor ayoŋ, toruwor aduketait ŋina ajio ayoŋ alotooma ikotere aiun.

³ Kire jik irae iyoŋ ataaba kaŋ ka aduketait ŋina ajio ayoŋ alotooma; aŋuna ka akitopoloor ekiro kon, torikoe ayoŋ ka kitenae.

⁴ Kiuryarae ayoŋ aneni akalokunitotor ayoŋ ŋimoe kaŋ, anerae neni kon aiunor ayoŋ.

⁵ Nakan kon Ekapolon ewuakini ayoŋ etau kaŋ. tolakunae ayoŋ, Ekapolon, irae Akuj ŋina ikinyoma.

⁶ Aremokino ayoŋ ŋituŋa ŋulu ikinyomito ŋakujo ŋuna emam ajokis; ido ekekinyomit ayoŋ iyoŋ.

⁷ Alakar ayoŋ ka alelyani aŋuna ka amina kon a ŋina nyiryaŋiryaŋa, anerae ibu iyoŋ kiŋolik ŋican kaŋ ka ibu ikiŋarak ayoŋ anaryeba.

⁸ Nyejalakina iyoŋ ayoŋ neni a ŋimoe kaŋ; nai ikicamak iyoŋ ayoŋ alosi neni daadaŋ acamit.

⁹ Kisyonitetei ayoŋ okoe Ekapolon, anerae ayai ayoŋ locan; amuumu ŋakonyen kaŋ aŋuna ka akiyaloloŋ eyaloloŋiyosi daŋ etau ka akuwan kaŋ.

¹⁰ Eyaloloŋi ayoŋ anakiyar kaŋ; esuta ayoŋ alokaru a ŋulu ka akiyar kaŋ a daadaŋ; adaun agogoŋu kaŋ aŋuna ka akiyaloloŋ kaŋ, ido alilimiyosi ŋakoyo kaŋ.

¹¹ Aruwor ayoŋ ejamuwaritono a ŋimoe kaŋ a daadaŋ, aruwor ayoŋ ŋolo enyasuna aneni a ŋikidunyet kaŋ, ani ekeŋolekinete ayoŋ ŋituŋa alorot, toema aneni kaŋ.

¹² Nyeriŋa ŋituŋa akatamunito ayoŋ anatameta, ikikwaanikin ayoŋ ka ituŋanan ŋini aberakin atwanare; ikikwaanikin ayoŋ ka eborosit ŋolo ebwaŋaŋ;

¹³ anerae apupi ayoŋ ŋituŋa ŋulu alalak iŋaiŋaasi; eyai ekabule lowaetin kaŋ daadaŋ; Eyeete ikes ŋakiro ŋuna aaret ayoŋ, ido totukut akiar ayoŋ.

¹⁴ Nai ekekinyomit ayoŋ iyoŋ okoe Ekapolon; abala ayoŋ, “Irae iyoŋ Akuj kaŋ.”

¹⁵ Nakan kon eyai akiyar kaŋ; toiunae ayoŋ alomoe kaŋ, a ŋulu ekemanito ayoŋ.

¹⁶ Torimaanikinae ayoŋ eketiyan kon, toiunae ayoŋ alotooma amina kon ŋina nyiryaŋiryaŋa.

¹⁷ Nyikimyek ayoŋ ekesurumyo ŋileec, okoe Ekapolon anerae neni kon ekinyomit ayoŋ; kimyek ŋulu aronok kisurumae ŋileec kimyek ikes toloto nakibois a ŋikatwak kililiŋa cek a nen.

¹⁸ Kisililiŋ ŋulu irworosi alyokonu, alotooma akituro ka akitoroniyarit, irworosi ikes isupasi, ido eremokino ŋulu iyookino.

¹⁹ Epol nooi ajokis aŋiboro a ŋulu ajokak, Ŋina idaritor iyoŋ ŋulu ikitopoloorito iyoŋ, eyenete ŋituŋa daadaŋ ajokis kon ka idau iyoŋ akitoodikin neni a ŋulu ikikinyomito iyoŋ.

²⁰ Ibu iyoŋ kiwua ikes anakibois a ŋina iyai iyoŋ, ikotere nyeryamut ŋuna aronok etukete ŋituŋa akitiya neni kec; ibu iyoŋ kiwua ikes anakibois a ŋina ajokan, ikotere nyeryamut ŋiyany alomoe kec.

²¹ Akipuro toyai neni ke Ekapolon, anerae abu iŋes kitoodiu amina keŋ ŋina ka aumokin neni kaŋ, apaki ŋina ekerikaunitere ayoŋ ikwa etaun ŋolo irikaunito ŋimoe.

²² Abu ayoŋ otema apaki ŋina ayakar locan, “idau iyoŋ akiritar ayoŋ aneni kon.” Nai ibu iyoŋ kiira akigworo kaŋ, apaki ŋina akanyara ayoŋ iyoŋ akiŋarakin ayoŋ.

²³ Tominakisi Ekapolon, iyes daadaŋ ŋulu inupito neni ka Akuj. Iuryarit Ekapolon ŋulu ikinyomito iŋes, nai isicaneneene ŋiketurok alopite a ŋolo emaikina kisicanere ikes.

²⁴ Togogoŋioto ka toena ŋitai, iyes daadaŋ ŋulu igenosi neni ke Ekapolon.