Ŋikiru. 30 - Ebaibul

Akilip ŋina ka alakar aŋuna ka aŋaleun anadyaka (Ekiruk a Daudi akoloŋit ŋina etaleunere Akai ka Akuj)

¹ Okoe Ekapolon, ekepuri ayoŋ iyoŋ, anerae ikiu iyoŋ ayoŋ, ido ibu iyoŋ nyimyek ŋimoe kaŋ akakyenatar ayoŋ.

² Okoe Ekapolon Akuj kaŋ, abu ayoŋ ekalou neni kon eŋita akitaŋaleuno, ido ibu iyoŋ ikitaŋaleu ayoŋ.

³ Okoe Ekapolon, ibu iyoŋ nyikimyek ayoŋ olot nakibois a ŋikatwak, nai idau iyoŋ aiun ayoŋ nyaloma nalup.

⁴ Toeoto ŋikipurisyo neni ke Ekapolon, iyes ŋikanupak keŋ; kipuro ekiro keŋ ŋolo asegan,

⁵ Nyeai iŋes apaki ŋina aoyan eŋoit, nai erubakini ajokis keŋ aneni a ituŋanan ŋirwa daadaŋ ŋulu ka akiyar a ituŋanan a ŋin, tari daŋ kegwor ayoŋ akuwar kya, aryamuni ayoŋ alelyanu taparacu.

⁶ Apaki ŋina ayakar ayoŋ emam ŋace, abu otema, “Mam ŋini akareuni ayoŋ.”

⁷ Okoe Ekapolon, ani ŋina ibunio iyoŋ ikiŋarakinia ayoŋ, ibu iyoŋ ikiu ayoŋ lopite ŋolo eiunor ituŋanan alomoru; nai ŋina ibunio iyoŋ nyimitak akiŋarakin ayoŋ, abu ayoŋ okuryaniar.

⁸ Okoe Ekapolon, abu ayoŋ egwor neni kon, abu ayoŋ elipi neni kon akiŋarakinio abala,

⁹ “Anijokis iryamuni iyoŋ erae katwana ayoŋ? Nyo iryamuni iyoŋ erae kaloma ayoŋ nalup? Epedorete mono ŋulu aruwor apuwa akipur iyoŋ a? Epedorete mono ikes akisera ajokis kon a?

¹⁰ Kiirarae ayoŋ okoe Ekapolon, ido ikisyoni ayoŋ; okoe Ekapolon, toruwor kare ca ekeŋarakinan kaŋ.”

¹¹ Idau iyoŋ akituruwor akiyaloloŋ kaŋ alelyanu ŋina kidoŋaet; idau iyoŋ akitalacar ayoŋ ŋilowi kaŋ ŋulukigworyet, ido ikiinak iyoŋ ayoŋ alelyanu,

¹² aŋun, nyeliliŋi ayoŋ, aeikini ekipur neni kon. Okoe Ekapolon Akuj kaŋ, arubakini ayoŋ alakara neni kon ŋikaru ka ŋikaru.