Ŋikiru. 3 - Ebaibul

Kikinyom Akuj ikimanit emoit kon (Ekiruk a Daudi apaki ŋina aemya aneni ka Abusalom alokoku keŋ)

¹ Okoe Ekapolon, etya mono ai ŋimoe kaŋ! elalak ŋulu ekemanito ayoŋ,

² elalak ŋulu ebasi neni kaŋ, “Emam akiŋarakinet iryamuni iyoŋ aneni ka Akuj.”

³ Nai okoe Ekapolon, iyoŋ irae aupal ŋina ipakarit ŋican kaŋ, iyoŋ ikiinakini ayoŋ akiloun iyoŋ ikinyakakini ayoŋ atitinyu.

⁴ Ekaloikini ayoŋ Ekapolon ekeŋarak ayoŋ, ido akaboŋokini iŋes ayoŋ alomukura keŋ a ŋolo asegan.

⁵ Aperi ayoŋ ojotoor; okyenyu nabo, anerae Ekapolon ekedarit ayoŋ.

⁶ Nyakuryaniar ayoŋ tari aŋuna a ŋituŋa a ŋulu alalak nooi, a ŋulu atukut akiman ayoŋ alowaetin kaŋ a daadaŋ.

⁷ Bua kare ca, okoe Ekapolon! Toiunae ayoŋ, okoe Akuj kaŋ! Anerae isicani iyoŋ ŋimoe kaŋ daadaŋ, imyekini iyoŋ ikes emam agogoŋu ŋina akawaniata ayoŋ.

⁸ Neni kon Ekapolon ebunitor aiuno; elipi min arereŋu kon neni a ŋituŋa kon.