Ŋikiru. 29 - Ebaibul

Etoil ka Akuj ŋolo agogoŋon nooi (Ekiruk a Daudi)

¹ Kipuro Ekapolon, iyes ŋisubuna ŋulu anakuj, kipuro apolou ka apedor keŋ.

² Kipuro ekiro ke Ekapolon ŋolo eyakar apolou, kilipa neni ke Ekapolon apaki ŋina etakanunia iŋes anasegis keŋ.

³ Epupo etoil ke Ekapolon ananamyo, ikilya irworo Akuj ŋina ka apedor, ipukat Ekapolon anam ŋina apolon nooi.

⁴ Ikilya nooi etoil ŋolo ke Ekapolon; eyai apedor ŋina ailiilon lotoil ke Ekapolon.

⁵ Ebilibili etoil ke Ekapolon ŋikito ŋulu enyaritae cedar; ebilibili etoil ke Ekapolon tari ŋikito a cedar ŋulu eya Lebanon.

⁶ Itamarani Ekapolon ŋimoru ŋulu a Lebanon toporo lopite ŋolo eporyo imanaŋit ka itamarani emoru Erimon topor lopite ŋolo eporyo etaok ŋolo atironon.

⁷ Ani irworikini Ekapolon, imilyauni ibore ŋini ikoni akim.

⁸ Itamarani etoil ke Ekapolon aloŋisat; itamarani Ekapolon aloŋisat ŋina a Kades.

⁹ Iloiloi nooi etoil ŋolo ke Ekapolon ŋikuyono ka toraraiya ŋakwii anamon kidoŋo ŋikito emam ŋakwii, ido alo Kai keŋ ebasi daadaŋ, “Apolou toyai neni ka Akuj!”

¹⁰ Ekapolon iŋes ipukat akalele; Ekapolon iŋes ipukat ikwapei Erwosit ŋikaru ka ŋikaru.

¹¹ Einanakini Ekapolon agogoŋu neni a ŋituŋa keŋ; iterereŋi Ekapolon ŋituŋa keŋ a ekisil.