Ŋikiru. 28 - Ebaibul

Akilip ŋina ka akiŋarakino ka alakar a ŋun (Ekiruk a Daudi )

¹ Okoe Ekapolon, akanyarit ayoŋ iyoŋ; ekaiunan kaŋ, nyiŋer akiirar ŋakiro kaŋ, anerae ani kikililiŋ iyoŋ ayoŋ, ayakaun ayoŋ neni a ŋulu adaut atwakare.

² Kiira ŋakiro ŋuna ka akilip kaŋ, apaki ŋina egworor ayoŋ neni kon akiŋarakino, apaki ŋina ekeyaaritor ayoŋ ŋakan kaŋ elipi neni kon eteorit nakibois kon ŋina asegan nooi.

³ Nyikitubok ayoŋ ka ŋulu aronok kaapei, nyikitubok ayoŋ ka ŋulu itiyaete ŋuna aronok, ŋulu irworosi ŋuna ke ekisil neni a ŋikidunyet kec, toyai bo amoitanut lotai kec.

⁴ Kisican ikes alopite a ŋolo itiyaata ka alopite a ŋolo ka aronis a ŋiticisyo kec; kisican ikes alopite a ŋolo a ŋiticisyo a ŋakan kec; inak ikes akisicanet ŋina emaikina toryamut;

⁵ anerae ejamuwarito ikes ŋiticisyo ŋulu ke Ekapolon, kori ŋisubuna ŋulu abu Ekapolon tosub, aŋun, isicani Ekapolon ikes ka emunyari ikes jik.

⁶ Akipuro toyai neni ke Ekapolon, anerae eira akigworo kaŋ aŋuna ka akiŋarakino.

⁷ Ekapolon iŋes agogoŋu kaŋ ka aupal kaŋ; neni keŋ iŋes ekinyomit ayoŋ a etau kaŋ a daadaŋ; aŋun, ekeŋarakinit ayoŋ Ekapolon, ido elelyani etau kaŋ, tosodi a eete kaŋ, alakar ayoŋ neni keŋ.

⁸ Ekapolon iŋes erae agogoŋ a ŋituŋa keŋ; iŋarakini ka eiuni iŋes erwosit ŋolo abu iŋes toseu.

⁹ Okoe Ekapolon, toiu ŋituŋa kon, kiterereŋ ŋituŋa kon; toruwor ekeyokon kec ka kiric ikes ŋikaru ka ŋikaru.