Ŋikiru. 25 - Ebaibul

Akilip aŋuna ka akiŋarakino ka alakuno (Akilip a Daudi)

¹ Okoe Ekapolon, neni kon iŋes erworo ayoŋ elipi.

² Okoe Akuj kaŋ, neni kon iŋes ekinyomit ayoŋ; nyikimyek ayoŋ ekesirumyo ŋileec; nyicamak ŋimoe kaŋ ekelout ayoŋ.

³ Nyimyek ŋituŋa ŋulu ikigenosi iyoŋ kisirumae ŋileec; nai ŋulu ikiŋereneneete iyoŋ emam ŋuna ikiŋeritotor, ikes emaikina kisurumae ŋileec.

⁴ Okoe Ekapolon, kitatamae ayoŋ oyar ikwaŋina icamitor iyoŋ, kitatamae ayoŋ ewuap ŋuna icamit iyoŋ.

⁵ Kitatamae ayoŋ ewuap ŋakiro kon ŋuna a kire, anerae irae iyoŋ Akuj kaŋ ka akaiunan kaŋ, ido ekegeno ayoŋ iyoŋ apaaran daadaŋ.

⁶ Okoe Ekapolon, totamunite akisyon kon ŋina apolon ka amina kon ŋina nyiryaŋiryaŋa, anerae itoodiunit iyoŋ ŋun neni kosi ŋinapei koloŋ.

⁷ Tojoŋo atamunit ŋasecisya ŋuna ka asorokanut kaŋ, kori ŋipitesyo kaŋ ŋulu akaŋereneneo ayoŋ iyoŋ; totamunae ayoŋ anamina kon a ŋina nyiryaŋiryaŋa, anerae ijok iyoŋ, okoe ekapolon.

⁸ Ejok ka iyookino Ekapolon; aŋun, itatami iŋes ŋikasecak akiwuap ŋakiro keŋ.

⁹ Itenit Ekapolon anakiyookino ŋulu itiditeuna make, itatami iŋes ŋulu itiditeuna make kiwuapa acamit keŋ.

¹⁰ Itenit Ekapolon anamina ka anakikinyoma daadaŋ ŋulu iwuapito acamunet keŋ ka ŋuna elimunit iŋes.

¹¹ Aŋuna ka akitopoloor ekiro kon, okoe Ekapolon, kisyoni ŋasecisya kaŋ, anerae elalak nooi.

¹² Ikes ŋulu itopoloorito Ekapolon, itatamikini Ekapolon ikes erot ŋolo emaikina ikes toseut.

¹³ Erubakinete ŋituŋa ŋul iboiyete anakiyar a ŋina ajokan, eruwor akwap ŋina a ŋidwe kec.

¹⁴ Erae Ekapolon ekone a ŋulu itopoloorito iŋes, ido itatamununui Ekapolon ikes acamunet keŋ.

¹⁵ Neni ke Ekapolon eŋoliyarit ayoŋ a ŋinapaki, anerae iŋes bon akalakuni ayoŋ alocan.

¹⁶ Okoe Ekapolon, kiŋolikinae ayoŋ itorimak, anerae akasiliki ayoŋ, ido aryamu ŋican.

¹⁷ Eyatakin ŋican alotau kaŋ, toiunae ayoŋ alocan kaŋ.

¹⁸ Kiŋolik akiyaloloŋ ka ŋican kaŋ, ido ikisyon ayoŋ anasecisya kaŋ a daadaŋ.

¹⁹ Kiŋolik epite ŋolo eyatakinotor ŋimoe kaŋ ka epite ŋolo akaryenyaanikinitotor ikes ayoŋ nooi.

²⁰ Kiyokoi ayoŋ ka toiunae ayoŋ; nyikimyek ayoŋ ekesirumyo ŋileec, anerae neni kon iŋes aryamunitor ayoŋ aiuno.

²¹ Elipi ayoŋ okoiu ajokis kaŋ ka akiyookino kaŋ, anerae ekegeno ayoŋ iyoŋ.

²² Okoe Akuj, tolaku Ŋisirael alocan kec a daadaŋ.