Ŋikiru. 17 - Ebaibul

Akilip ŋina ka alakuno aneni a ŋikaarak (Akilip a Daudi)

¹ Okoe Ekapolon, topupok kare ca ŋakiro kaŋ nu ŋuna iyookino; kiira kare ca akigworo kaŋ; kiira akilip kaŋ ŋina elipi ayoŋ emam alyokonu.

² Elipa ayoŋ itotubok iyoŋ ayoŋ anakiyookino kaŋ; anerae iyeni iyoŋ ŋuna iyookino.

³ Idau iyoŋ akisyem etau kaŋ, ibu iyoŋ bu neni kaŋ nakwaare, idau iyoŋ akikatakin ayoŋ, ido nyeryamuna iyoŋ ŋuna aronok aneni kaŋ; nyelimuno ayoŋ ŋakiro ŋuna aronok.

⁴ Nyerworo ayoŋ ŋuna aronok lopite ŋolo irworotor ŋituŋa ŋuluce, adau ayoŋ akiwuapakin akiciket kon; nyiwuapa ayoŋ ŋipitesyo a ŋiryenyaanotin.

⁵ Ewuapit ayoŋ ŋikukus kon jik; nyeoliyoro ayoŋ alorot kon.

⁶ Akanyarit ayoŋ iyoŋ, okoe Akuj, anerae ikiboŋokini iyoŋ ayoŋ, topupok ejok, ido kiira ŋakiro kaŋ.

⁷ Kitoodiu amina kon ŋina apolon nooi, Okoe ekaiunan a ŋulu eponito neni kon aiuno alomoe kec.

⁸ Kiyokoi ayoŋ lopite ŋolo iyokitere ecopot ŋolo ka akoŋu; kiwuae ayoŋ alopite a ŋolo iwuaya akokoroit ŋicwi anabebenuk keŋ,

⁹ kiwuae ayoŋ nyakawana ŋulu aronok, kiwuae ayoŋ nyakaar ŋimoe kaŋ ŋulu ekerimokinito ayoŋ kidiŋ.

¹⁰ Emam akisyon alotai kec; iturosi ikes irworosi.

¹¹ Ekewuapito ikes ayoŋ, ido adaut akirikaun, iwarito ikes aryamun apaki ŋinaaret ayoŋ oloma kwap.

¹² Ikwaan ikes ke eŋatuny ŋolo etenit aryetar ibore ŋini ikamuni, ikwaan ikes ke eŋatuny ŋolosorokit ŋolo edapunit ibore anamoni.

¹³ Tonyou okoe Ekapolon, kitijik ikes, kilou ikes, toiunae ayoŋ a ekileŋ kon aneni a ŋulu aronok.

¹⁴ Okoe Ekapolon, toiunae ayoŋ a akan kon alotuŋa a ŋulu ikote lu; alotuŋa a ŋulu ka akwap a na a ŋulu erae eropit kec ibore ŋini eryamunete ikes anakiyar a na. Kisican ikes a ŋican a ŋulu itemokinit iyoŋ aŋuna kec, elipi toryamut ŋidwe kec ŋican ŋulu alalak nooi, ŋulu eryamunete tari ŋipapae kec.

¹⁵ Ani eruwor ayoŋ, eŋolikini ereet kon, anerae eyookino ayoŋ, ani akyenyuni, alakar ayoŋ eŋolikini epite ŋolo iyakar iyoŋ.