Ŋikiru. 148 - Ebaibul

Akipur Akuj ŋina ka apolou a daadaŋ kaapei

¹ Kipuroe Ekapolon! Kipuro Ekapolon anakuj; kipuro iŋes iyes ŋulu iyakasi kidiama.

² Kipuro iŋes iyes ŋimalaikan daadaŋ, kipuro iŋes iyes ŋajorei ŋuna anakuj daadaŋ.

³ Kipuro iŋes iyes akoloŋ ka elap, kipuro iŋes iyes ŋikacer daadaŋ ŋulu icayete.

⁴ Kipur iŋes iyoŋ kidiama nooi ka ŋakipi ŋuna iya kidiama ariwo.

⁵ Emaikina ikes daadaŋ kipuro ekiro a Ekapolon, anerae abu iŋes tolimu akirot, ido apotu ŋul daadaŋ toyakaun.

⁶ Abu iŋes kiwuak ikes nen kidiŋ nakuj ka akwap, kiboiyoto a nen ŋikaru ka ŋikaru; abu iŋes kigerok neni iboiyoto ikes, neni nyiyotoryata jik.

⁷ Kipuro anakwap Ekapolon, iyes ŋisubuna ŋulu apolok ananam ka ŋulu iya kwap ŋakipi.

⁸ Kipuro Ekapolon iyes akimilya ka ŋakako, ekwok ŋolo ka akiru ka ŋidouwon, ta ekuwuam ŋolo agogoŋon ŋolo iwuapit ŋuna alimu Ekapolon.

⁹ Kipuro Ekapolon iyes ŋimoru ka ŋimukura daadaŋ, ŋikito ŋulu a ŋaraito ka ŋulu a Cedar daadaŋ,

¹⁰ iyes ŋityaŋ ŋulu ka ariet ka ŋibaren daadaŋ, ŋisubuna ŋulu alyatok ka ŋikyeny.

¹¹ Kipuro Ekapolon iyes ŋirwosi ŋulu ka akwap ka ŋituŋa daadaŋ, iyes ŋikapolok ka ŋikepukak daadaŋ,

¹² Iyes ŋidyain ka ŋapesur, ŋimojoŋi ka ŋidwe.

¹³ Emaikina ikes kipuro ekiro ke Ekapolon, anerae ekiro keŋ bon itopolooritae; epol nooi ailiil keŋ anakwap ka anakuj.

¹⁴ Ainaki iŋes ŋituŋa keŋ agogoŋu, ikotere ŋituŋa ke Ekapolon daadaŋ ipurete iŋes. Ŋituŋa a Isirael ŋulu emina Ekapolon nooi. Kipuroe Ekapolon!