Ŋikiru. 147 - Ebaibul

Ekipur neni ka Akuj aŋuna eyokiyo Yerusalem

¹ Kipuroe Ekapolon! Erae ibore ŋini ajokan aeikin ekipur neni ka Akuj yok, anerae ejok iŋes, erae akipur iŋes ibore ŋini emaikina kitiyae.

² Edukokini nabo Ekapolon Yerusalem; ecununi Ŋisirael ŋulu arikor nakwapin.

³ Isimukekini ŋulu amamukaun amukeo alotai kec, imaduni ŋulu ewanan.

⁴ Ekapolon iŋes abu kiwuak ekimar a ŋikacer, ido tolimonok ikes ŋirorwa kec.

⁵ Epol nooi Ekapolon yok, epol nooi apedor keŋ; nyisalunun aosou keŋ.

⁶ Iŋarakinit Ekapolon ŋulu itiditeuna make, nai emunaanari ŋulu aronok kitoloma kwap.

⁷ Toeoto neni ke Ekapolon ilakara neni keŋ toeokisi neni ke Ekapolon yok iramete aduŋgu.

⁸ Ebutanakini iŋes ŋidouwon kidiama, eyaununui akiru kwap, iturupununui ŋinya alomukura.

⁹ Einanakini ŋibaren ka ŋityaŋ akimuj kec, einanakini akimuj neni a ŋicwi a ŋikurukwa apaki ŋina ikalounioto.

¹⁰ Nyeyai alakara keŋ naŋolei ŋuna agogoŋok nyeyai tari lokajiok ŋulu adedeŋak;

¹¹ Nai elakara Ekapolon aŋuna a ŋulu itopoloorito iŋes, a ŋulu iwuakinito akigeno kec namina keŋ ŋina nyiryaŋiryaŋa.

¹² Okoe Yerusalem, kipur Ekapolon! Okoe Sion, kipur Akuj kon;

¹³ anerae etogogoŋ iŋes ŋasuwa ŋuna a ŋipukei kon, ido eterereŋ ŋituŋa kon alotooma kon.

¹⁴ Ewuak iŋes ekisil lokukorin kon, esimwon iŋes ŋituŋa kon a ŋikinyom a ŋulu esibito erau, a ŋulu ajokak nooi.

¹⁵ Iyakununui iŋes akiciket keŋ nakwap; iiranarete ŋituŋa akirot keŋ atipei.

¹⁶ Epetanakini iŋes kidiama akwap ibore ŋini akwaŋan ŋini esibit ekwok, ielanari iŋes ekuno lopite ŋolo ielarya ekuwuam ekuron.

¹⁷ Iyakununui ŋakako todout kwap ikwa ŋamoru ŋuna iteiteitae. Ŋae epedori akidaŋidaŋ alilimu ŋina eyaununui Ekapolon?

¹⁸ Iyakununui Ekapolon akirot keŋ, ido totalasi ŋakako; itukutununui Ekapolon ekuwuam, ido toleleiyasi ŋakipi.

¹⁹ Adau iŋes akiteyenikin akirot keŋ neni a Yakob, adau akiteyenikin ŋikisila keŋ ka ŋakiro ŋuna etubunit iŋes neni a Isirael.

²⁰ Emam akwap ace etiyak iŋes ŋakiro ŋun, nyeyenete ŋakwapin ŋunace ŋikisila keŋ. Kipuroe Ekapolon!