Ŋikiru. 145 - Ebaibul

Apolou nooi ka ajokis ŋina ka Akuj (Ekipur a Daudi)

¹ Okoe Akuj, erwosit kaŋ, eketopoloori ayoŋ iyoŋ; epuri ayoŋ ekiro kon ŋikaru ka ŋikaru.

² Ekepuri ayoŋ iyoŋ a ŋinakoloŋit; epuri ayoŋ ekiro kon ŋikaru ka ŋikaru.

³ Epol nooi Ekapolon, emaikina kipuroe iŋes itopolooritae nooi; emam ituŋanan epedori akisalun ayenun apolou keŋ.

⁴ Elimori anyamet apei nanyamet ŋinace ŋuna idau iyoŋ akitiya; elimori iŋes ŋiticisyo kon ŋulu ka aumokin.

⁵ Atamatamae ayoŋ akibuses ŋina ka apolou kon a ŋina ailiilon, ido atamatamae ayoŋ ŋuna a ŋiticisyo kon a ŋulu ka aumokin.

⁶ Iseraete ŋituŋa ŋuna ka apedor a ŋiticisyo kon a ŋulu ka aumokin, ido alimori ayoŋ ŋuna ka apolou kon nooi.

⁷ Iseraete ikes ŋuna ka ajokis kon a ŋina apolon nooi. eikinete ecelasi nooi aŋuna ka akiyookino kon.

⁸ Isyoniono Ekapolon ka erimaana, nyepatana iŋes akiŋo, epol amina keŋ ŋina nyiryaŋiryaŋa.

⁹ Ejok Ekapolon aneni a daadaŋ, isyoniyenene iŋes daadaŋ ŋulu abu iŋes tosub.

¹⁰ Okoe Ekapolon, elakarosi neni kon ŋisubuna daadaŋ ŋulu ibu iyoŋ tosub, elakarosi neni kon daadaŋ ŋulu ikikinyomito iyoŋ.

¹¹ Irworete ŋuna ka apolou a apukan kon, irworete ŋuna ka apedor kon,

¹² ikotere ŋituŋa daadaŋ eyenunete ŋiticisyo kon ŋulu ka aumokin ka apolou ŋina ailiilon ŋina ka apukan kon.

¹³ Erae apukan kon ŋina a ŋikaru ka ŋikaru, irae iyoŋ ekepukan ŋolo a jik, ŋolo a ŋanyameta a daadaŋ. Erae Ekapolon ŋolo ikinyoma anakiikineta keŋ a daadaŋ, emina iŋes ŋisubuna keŋ daadaŋ.

¹⁴ Iŋarakini Ekapolon ŋulu eyakasi locan, iŋaranakini daadaŋ ŋulu adaun akitapapanun.

¹⁵ Neni a Ekapolon eyarikinito ŋisubuna daadaŋ, ido inanankini iyoŋ ikes akimuj anapaki a ŋina iitanitotor.

¹⁶ Inanakini iyoŋ ikes ibore ŋini itemokino, isimwoneneene iyoŋ ibore daadaŋ ŋini eyari.

¹⁷ Iyookino Ekapolon anakiro keŋ a daadaŋ, ido erimaana aloticisyo keŋ a daadaŋ.

¹⁸ Eapi Ekapolon aneni a daadaŋ a ŋulu enyaraete iŋes, a ŋulu enyaraete iŋes anakiyookino kec.

¹⁹ Isiyoonokini iŋes akiitanit a ŋulu itopoloorito iŋes; iiranari akigworo kec, eiununui ikes.

²⁰ Iyokit Ekapolon daadaŋ ŋulu eminasi iŋes, nai emunyari Ekapolon ŋulu aronok daadaŋ.

²¹ Aeikini ayoŋ ekipur neni ke Ekapolon; emaikina ŋisubuna daadaŋ kipuro ekiro keŋ ŋolo asegan ŋikaru ka ŋikaru.