Ŋikiru. 141 - Ebaibul

Akilip aŋuna ka akiuryaro anaronis (Ekiruk a Daudi)

¹ Okoe Ekapolon, akanyarit ayoŋ iyoŋ, kiŋarakinae ayoŋ atipei. Kiira etoil kaŋ apaki ŋina akanyaraa ayoŋ iyoŋ.

² Tocamu akilip kaŋ lopite ŋolo icamunia iyoŋ eure ke ekinyate ŋolo abobon; tocamu akikyaarit kaŋ ŋakan kaŋ lopite ŋolo icamunia iyoŋ amuronot ŋina ka ataboŋ.

³ Okoe Ekapolon, nyikimyek ayoŋ alimuni ŋakiro ŋuna aronok; nyicamak ŋakiro ŋuna aronok elomunete anakituk kaŋ.

⁴ Nyicamak etau kaŋ iwarit akitiya aronis, nyicamak itiyae ŋuna aronok ŋuna itiyaete ŋulu aronok; nyikicamak ayoŋ ayakaun nasuban a ŋulu itiyaete ŋuna aronok.

⁵ Kimyek ituŋanan ŋini iyookino ekesican ayoŋ, erae ŋun arimao kimyek ŋulu ikinyoma eketatam ayoŋ akimyekin akitiya aronis; erae ŋun amina; nyikimyek ayoŋ oŋer amina ŋin, anerae elipi ayoŋ jwi jwi eteŋeriyorit ŋiticisyo a ŋulu itiyaete aronis.

⁶ Ani ipotokinio ikes neni a ŋulu etubokinete ikes akisicanio, eyenunete ikes atemar kerae ŋakiro kaŋ ŋuna a kire.

⁷ Lopite ŋolo ebwaŋia ituŋanan ataaba kielakin ŋamoru kwap, ielakin ŋakoyo kec lokipetetyo a ŋalyalin.

⁸ Nai eŋoliunit ayoŋ neni kon, okoe Akuj, Ekapolon kaŋ; ewarit ayoŋ aiuno aneni kon, nyikimyek ayoŋ emam ŋini ekeuryarit.

⁹ Kiuryarae ayoŋ nyakawan ŋulu ekemanito ayoŋ, ka anaronis a ŋulu itiyaete aronis.

¹⁰ Kimyek ŋulu aronok tolomasi naronis kec pei, obucar ayoŋ bon.