Ŋikiru. 140 - Ebaibul

Akilip aŋuna ka alakuno alomoe (Ekiruk a Daudi neni a ŋolo apolokinit aeore)

¹ Okoe Ekapolon, tolakunae ayoŋ aneni a ŋulu itiyaete aronis; kiuryarae ayoŋ aneni a ŋulu aryenyaanak,

² a ŋulu etukete anatameta kec akitiya aronis, ido kipirete ŋijiesyo a ŋinapaki.

³ Itiitanito ikes ŋaŋajepa kec ikwa ŋuna a ŋimuno, ŋakiro ŋuna irworosi ikes erae ŋuna aarak, ikote akisorit ŋina ka akipom.

⁴ Okoe Ekapolon, kiyokoi ayoŋ anapedor a ŋulu aronok; kiuryarae ayoŋ aneni a ŋulu aryenyaanak, a ŋulu etukete akiar ayoŋ.

⁵ Adaut ŋiketurok ayeun anakimunono epite ŋoloaret ayoŋ; etalalata ŋirotin ŋulukikamunet ayoŋ ewuanakis lorotin kaŋ epite ŋolokikamunet ayoŋ.

⁶ Okoe Ekapolon, abala ayoŋ neni kon, “Irae iyoŋ Akuj kaŋ.” Okoe Ekapolon, kiira akigworo kaŋ aŋuna ka akiŋarakino.

⁷ Okoe Ekapolon, Ekapolon kaŋ, ekalakunan kaŋ ŋolo agogoŋon, ibu itoiu ayoŋ nyewana akoloŋit ŋina ke ejie.

⁸ Okoe Ekapolon, nyiinak ŋulu aronok apedor akitiya ŋuna ecamito; nyicamak ŋuna etukete ikes kitiyakin.

⁹ Eturokinosi ŋikapolok a ŋikidunyet kaŋ; kimyek ŋiman kec ŋulu ekemanitotor ikes ayoŋ toboŋokis ikes pei.

¹⁰ Kimyek ŋatotol ŋuna eriraete tobukokin neni kec; kimyek ikes kimasakinae, napanya ŋuna nyelomuniata nabo jik.

¹¹ Nyicamak ŋulu isudete ŋuluce ŋakiro etenete anakwap; kimyek aronis bu atipei tomunya ŋikaryenyaanak.

¹² Ayeni ayoŋ atemar eiununui Ekapolon ŋulu a ŋican, ido etubi anakiyookino ŋakiro a ŋulu eyakatar akiitanit.

¹³ Kire, ipurete ŋulu iyookino ekiro kon, ido iboiyete irukito ka iyoŋ.