Ŋikiru. 135 - Ebaibul

Akipuro Akuj aŋuna ka ajokis ka apedor keŋ

¹ Kipuroe Ekapolon! Kipuroe ekiro ke Ekapolon; iyes ŋiketiyak keŋ, kipuro Ekapolon,

² iyes ŋulu itiyaete alo Kai ke Ekapolon, iyes ŋulu iyakasi nalapatui ŋuna ka Akai ka Akuj yok.

³ Kipuro Ekapolon, anerae ejok Ekapolon; toeoto neni ke Ekapolon, anerae erae ŋun ŋuna ejok akitiya.

⁴ Abu Ekapolon toseu Yakob aruwor ituŋanan keŋ, abu Ekapolon toseu Ŋisirael aruwor ŋituŋa keŋ a elope.

⁵ Ayeni ayoŋ atemar epol Ekapolon nooi, epol Ekapolon yok nooi akilo ŋakujo daadaŋ.

⁶ Itiyae Ekapolon ŋuna daadaŋ italakarito iŋes, anakuj ka alokwap, ananamyo ka aloburin kec a daadaŋ.

⁷ Eyaununui iŋes ŋidouwon anakisaleta ka akwap; eyaununui iŋes akimilyaa aŋuna ka akiru, ido eyaununui ekuwuam aneni sek eyai.

⁸ Abu iŋes toar ŋikiyae alo Ijipit, ŋikiyae a ŋituŋa ka ŋulu a ŋibaren.

⁹ Abu iŋes kiyaku nakwap a Ijipit, ŋakujuwuanisya ka ŋaumonokineta, aŋuna ka akisicania Parao ka ŋulu epukatotor iŋes.

¹⁰ Abu Ekapolon tomunya ŋituŋa a ŋakwapin a ŋuna alalak, toar ŋirwosi ŋulu ajiok nooi ikwapei

¹¹ Sikon, erwosit ŋolo a Ŋiamori, ka Og, erwosit ŋolo a Basan ta ŋirwosi daadaŋ ŋulu a Kanaan,

¹² ido inak akwap kec neni a Ŋisirael, toruwor ŋina a ŋituŋa keŋ a Ŋisirael.

¹³ Okoe Ekapolon, eyai ekiro kon jik ŋikaru ka ŋikaru, okoe Ekapolon ikiyenete iyoŋ ŋituŋa a ŋanyameta a daadaŋ,

¹⁴ anerae ituruwori Ekapolon ŋituŋa keŋ ŋulu iyookino, ido isyoni Ekapolon ŋiketiyak keŋ.

¹⁵ Erae ŋakujo a ŋakwapin esilipa ke egolid, erae ŋuna itiyaunito ŋituŋa.

¹⁶ Eyakatar ŋakujo ŋun ŋakitukwa, nai nyirworosi eyakatar ŋakonyen, nai nyiteete;

¹⁷ eyakatar ŋaki, nai nyepupete, emam tari ekuwuam elomununui anakituka kec.

¹⁸ Ikwaanikin ŋulu itiyaete ŋakujo ŋun ka ŋakujo ŋun, ido ŋulu ikinyomito ŋakujo ŋun daŋ ikwaanikin ka ikes.

¹⁹ Okoe ŋituŋa a Isirael, kipuro Ekapolon! Okoe ŋituŋa ka Aron, kipuro Ekapolon!

²⁰ Okoe ŋituŋa a Lepi, kipuro Ekapolon! Iyes ŋituŋa ŋulu itopoloorito Ekapolon kipuro Ekapolon.

²¹ Kipuroe Ekapolon alo Sion, kipuroe Ekapolon ŋolo iboi alo Yerusalem. Kipuroe Ekapolon!