Ŋikiru. 119 - Ebaibul

Apolou ŋina a ŋikisila ka Akuj

¹ Elakara ŋituŋa ŋulu itiyaete ŋuna iyookino, ŋulu iboiyete iwuapito ŋikisila ke Ekapolon.

² Elakara ŋituŋa ŋulu iwuapito ŋakiro ŋuna etubunit iŋes, ŋulu iwarito Ekapolon a ŋitai kec a daadaŋ,

³ ŋulu daŋ nyitiyaete ŋuna aronok, nai iboiyete iwuapito ŋakiro ke Ekapolon.

⁴ Ekapolon, idau iyoŋ ainakin isua ŋikisila kon, ŋulu emaikina isua kiwuapae emam akibil tari epei.

⁵ Okoe elipi ayoŋ opedo arubakin anakiwuapit ŋakiro kon!

⁶ Iŋes nai nyekesurumere ayoŋ ŋileec, aŋuna amunikinitor akiwuapit ŋakiciketa kon.

⁷ Ekepuri ayoŋ iyoŋ ke etau a ŋolo iyookino, apaki ŋina ayenunia ŋikisila kon ŋulu iyookino.

⁸ Ewuapi ayoŋ ŋakiro ŋuna itubunit iyoŋ; nyikimyek ayoŋ jik.

Akiwuapit ŋikisila ke Ekapolon

⁹ Alipite epedoryata ŋisorok akiwuapakin ŋipitesyo kec erae ŋulu ajokak? Erae anakiwuapit akirot kon.

¹⁰ Ekewarit ayoŋ iyoŋ ke etau kaŋ a daadaŋ; nyikimyek ayoŋ ooliyo anakiciketa kon.

¹¹ Ericit ayoŋ nooi akirot kon alotau kaŋ, ikotere ayoŋ nyasec aneni kon.

¹² Akipuro toyai neni kon, okoe Ekapolon; kitatamae ayoŋ ŋakiro ŋuna itubunit iyoŋ.

¹³ Alimori ayoŋ ka akituk kaŋ ŋikisila daadaŋ ŋulu ilimu iyoŋ.

¹⁴ Aryamunit ayoŋ alakara anakiwuapit ŋakiro ŋuna itubunit iyoŋ, lopite ŋolo elakaror ituŋanan alobari a daadaŋ.

¹⁵ Atamatamae ayoŋ ŋuna a ŋikisila kon, amitakinit akiwuapit ŋuna ibala iyoŋ.

¹⁶ Alakara ayoŋ anakiwuapit ŋakiro ŋuna itubunit iyoŋ, nyekemuryakini ayoŋ akirot kon.

Alakara alotooma ŋikisila ke Ekapolon

¹⁷ Kitiya ŋuna ajokak nooi neni ke eketiyan kon, ikotere ayoŋ ayari ewuap akirot kon.

¹⁸ Toŋaa ŋatameta kaŋ, ikotere ayoŋ ayenuni ŋakiro ŋuna ka aumokin ŋuna a ŋikisila kon.

¹⁹ Eboi ayoŋ anakwap arae igelaanot; nyiwua aneni kaŋ ŋakiciketa kon.

²⁰ Epol nooi ekimue ŋolo a ŋikisila kon alotau kaŋ ŋapakio daadaŋ.

²¹ Ikitoŋoyenete iyoŋ ŋiketurok ŋulu ilamam, ŋulu eoliyonorete anakiwuapit ŋakiciketa kon.

²² Tolema aneni kaŋ ajamuwarit ka ŋiyany kec, anerae ewuapit ayoŋ ŋakiro ŋuna itubunit iyoŋ.

²³ Tari daŋ kiboiyonokin ŋikepukak iwapei etukete aremokin ayoŋ, arubakini ayoŋ eketiyan kon atamatamae ŋakiro ŋuna itubunit iyoŋ.

²⁴ Ŋakiro ŋuna itubunit iyoŋ ikes erae alakara kaŋ, ikes eketatamete ayoŋ.

Akimukekinit akiwuapit ŋikisila ke Ekapolon

²⁵ Aperi ayoŋ anapuwa arae ŋolo ekeloun; inakinae ayoŋ agogoŋu nabo alotooma akirot kon.

²⁶ Abu ayoŋ okolimok iyoŋ ŋipitesyo kaŋ, ido ibu iyoŋ ikiboŋok ayoŋ; kitatamae ayoŋ ŋakiro ŋuna itubunit iyoŋ.

²⁷ Kimyekinae ayoŋ oyenu ŋuna ebasi ŋikisila kon, ikotere nai otamatama ŋaumonokineta ŋuna itiya iyoŋ.

²⁸ Aup etau kaŋ akiyaloloŋ; kisimukekinae ayoŋ alotooma akirot kon.

²⁹ Kiyokoi ayoŋ nyewuap ŋuna nyiyookino, kitatamae ayoŋ anajokis kon ŋikisila kon.

³⁰ Aseu ayoŋ akiwuap ŋipitesyo ŋulu ka akikinyoma; ewuakinit ayoŋ ŋakiro ŋuna itubunit iyoŋ lotau kaŋ.

³¹ Okoe Ekapolon emiidikinit ayoŋ nakiro ŋuna itubunit iyoŋ, nyikimyek ayoŋ ekesurumyo ŋileec.

³² Ewuapit ayoŋ ŋakiciketa kon, anerae ibu iyoŋ ikiteyenu ayoŋ ŋakiro ŋuna alalak.

Akilip aŋuna ka ayenun ŋakiro

³³ Kitatamae ayoŋ okoe Ekapolon, oyenu ŋakiro ŋuna itubunit iyoŋ; ikotere nai ayoŋ ewuapi ikes ŋarwa daadaŋ.

³⁴ Inakinae ayoŋ ayenut, ikotere ewuapi ŋikisila kon, ewuap ikes ke etau kaŋ a daadaŋ.

³⁵ Kimyekinae ayoŋ ewuap ŋakiciketa kon, anerae nen iŋes aryamunia ayoŋ alakara.

³⁶ Inakinae ayoŋ acamit ŋina ka akiwuap ŋakiro ŋuna itubunit iyoŋ, akilo acamit aryamun ebari aŋuna kaŋ.

³⁷ Nyikimyek ayoŋ amitakinit ŋiboro ŋulu erae ŋikoŋinae; inakinae ayoŋ akiyar anakiwuapit akirot kon.

³⁸ Kisiyook akiikinet kon neni ke eketiyan kon, akiikinet kon neni a ŋulu ikitopoloorito iyoŋ.

³⁹ Toiunae ayoŋ aloyany a ŋulu eketukuryanito, anerae ejokak ŋakiro ŋuna itubunit iyoŋ.

⁴⁰ Acamit ayoŋ nooi akiwuap ŋakiciketa kon; kiteteu akiyar kaŋ anakiyookino kon.

Akikinyomit ŋikisila a Ekapolon

⁴¹ Elipi oryamu amina kon ŋina nyiryaŋiryaŋa, okoe Ekapolon, oryamu aiuno kon alotooma akiikinet kon;

⁴² iŋes nai aboŋokinio ayoŋ ŋulu ekeyanyete ayoŋ, anerae ekinyomit ayoŋ akirot kon.

⁴³ Nyilema anakituk kaŋ ŋakiro ŋuna a kire anerae ewuakinit ayoŋ akigeno kaŋ ŋakiro ŋuna itubunit iyoŋ.

⁴⁴ Ewuapi ayoŋ ŋikisila kon jwi jwi, ŋikaru ka ŋikaru.

⁴⁵ Ayari ayoŋ arae ŋolo eboi emam ŋace, anerae adau ayoŋ akikatakin akiwuap ŋakiciketa kon.

⁴⁶ Alimori daŋ ayoŋ alokiŋaren ŋirwosi ŋakiro ŋuna itubunit iyoŋ, nyekerumete ayoŋ ŋileec;

⁴⁷ alakara ayoŋ anakiciketa kon, anerae amina ayoŋ ikes.

⁴⁸ Etopoloorit ayoŋ ŋakiciketa kon ŋuna amina ayoŋ, ido etamatamae ŋakiro ŋuna itubunit iyoŋ.

Akikinyomit ŋikisila a Ekapolon

⁴⁹ Totamunite akirot kon neni a eketiyan kon ŋina ikiinakinia iyoŋ ayoŋ akigeno.

⁵⁰ Ŋuna ekesirworiunito ayoŋ alocan kaŋ ikes nu, akainanakini ayoŋ akiikinet kon akiyar.

⁵¹ Akajamuwarito ayoŋ nooi ŋiketurok, nai nyemyeanakini ayoŋ ŋikisila kon.

⁵² Ani atamuni ayoŋ ŋakiro ŋuna itubunit iyoŋ ŋuna aya ŋinapei koloŋ, okoe Ekapolon aryamuni ayoŋ akisirworiuno aneni kec.

⁵³ Ani eŋolikini ayoŋ ŋulu aronok ŋulu eŋerito ŋikisila kon, aŋoyenene ayoŋ nooi.

⁵⁴ ŋakiro ŋuna itubunit iyoŋ ikes aeo ayoŋ aneni daadaŋ eboikin.

⁵⁵ Atamunit ayoŋ ekiro kon tari nakwaare, okoe Ekapolon, ewuapit ayoŋ ŋikisila kon.

⁵⁶ Aruwor ŋun arereŋu aneni kaŋ, anerae ewuapit ayoŋ ŋakiciketa kon.

Ainakina lokisila ke Ekapolon

⁵⁷ Ekapolon iŋes erae ibore daadaŋ ŋini acamit ayoŋ; adau ayoŋ akiikin akiwuap ŋakiro kon.

⁵⁸ Ekeŋisit ayoŋ iyoŋ ke etau kaŋ a daadaŋ ikiŋarak ayoŋ, kisyoni ayoŋ lopite ŋolo idaunia iyoŋ akiikin.

⁵⁹ Ani atamatamae ayoŋ ŋuna a ŋipitesyo kaŋ, aboŋununui ayoŋ ewuap ŋakiro ŋuna itubunit iyoŋ;

⁶⁰ nyarubakini ayoŋ etiyae ŋace, nyadidi akiwuap ŋakiciketa kon.

⁶¹ Tari daŋ kekecocoete ayoŋ ŋulu aronok akitiya aronis, nyekemuryakinete ayoŋ ŋikisila kon.

⁶² Anyoununui ayoŋ kidiŋ akuwar akipur iyoŋ aŋuna a ŋakiro a ŋuna itubunit iyoŋ a ŋuna iyookino.

⁶³ Arae ayoŋ erukitos a daadaŋ a ŋulu ikitopoloorito iyoŋ, erukitos a ŋulu iwuapito ŋakiciketa kon.

⁶⁴ Okoe Ekapolon, ileleba nakwap amina kon ŋina nyiryaŋiryaŋa; kitatamae ayoŋ ŋakiro ŋuna itubunit iyoŋ.

Ajokis ŋina a ŋikisila a Ekapolon

⁶⁵ Okoe Ekapolon, itiya iyoŋ ejok neni ke eketiyan kon alotooma akirot kon.

⁶⁶ Kitatamae ayoŋ akitub ŋakiro ejok ka aosou, anerae anupit ayoŋ ŋakiciketa kon.

⁶⁷ Ani eriŋa ayoŋ nyisicana, abu ayoŋ ooliyo, nai tokona ewuapit ayoŋ akirot kon.

⁶⁸ Ijok iyoŋ, ido ejokak ŋuna itiyae iyoŋ; kitatamae ayoŋ ŋakiro ŋuna itubunit iyoŋ.

⁶⁹ Irworosi ŋiketurok alyokonu aŋuna kaŋ, nai ewuapit ayoŋ ke etau kaŋ a daadaŋ ŋakiciketa kon.

⁷⁰ Egogoŋ ŋakyes kec ka nyenomonorete ŋakiro, nai alakara ayoŋ alokisila kon.

⁷¹ Abu akisicanio toruwor ibore ŋini ajok aneni kaŋ, abu ayoŋ oyenu ŋakiro ŋuna itubunit iyoŋ.

⁷² Ejokak aneni kaŋ nooi ŋikisila ŋulu ilimunit iyoŋ, akilo esilipa ke egolid ŋolo alalan nooi.

Akiyookino ŋina a ŋikisila a Ekapolon

⁷³ Iyoŋ ikisubuni ka ikiyeuni ayoŋ; inakinae ayoŋ aosou oyenunia ŋakiciketa kon.

⁷⁴ Elipi tolelyana ŋulu ikitopoloorito iyoŋ ekeŋolikinete ayoŋ, anerae ewuak ayoŋ akigeno kaŋ nakirot kon.

⁷⁵ Okoe Ekapolon, ayeni ayoŋ atemar itubi iyoŋ ŋakiro anakiyookino, ido anakikinyoma kon, ikisican iyoŋ ayoŋ.

⁷⁶ Elipi ekesirworiu ayoŋ amina kon ŋina nyiryaŋiryaŋa, alotooma akiikinet kon neni a eketiyan kon.

⁷⁷ Kimyek akisyon kon bu neni kaŋ, ikotere ayoŋ ayari, anerae aryamunit ayoŋ alakara alokisila kon.

⁷⁸ Elipi kisurumae ŋiketurok ŋileec aŋuna ekesudyoto ayoŋ ŋakiro koŋin; ani eruwor ayoŋ, atamatamae ŋuna a ŋakiciketa kon.

⁷⁹ Elipi potu neni kaŋ ŋulu ikitopoloorito iyoŋ, ikotere eyenunete ŋakiro ŋuna itubunit iyoŋ.

⁸⁰ Elipi tomam ŋuna eketoroniyaritere ayoŋ alotooma ŋakiro ŋuna itubunit iyoŋ, ikotere ayoŋ nyekesurumi ŋileec.

Akilip aŋuna ka alakuno

⁸¹ Apapanu ayoŋ Ekapolon anakidarit aiuno aneni kon; ewuakinit ayoŋ akigeno kaŋ nakirot kon.

⁸² Akaup ayoŋ akidarit akiikinet kon, eŋita ayoŋ ebe, “Ori mono ikiŋarakinia iyoŋ ayoŋ?”

⁸³ Ikikwaanikin ayoŋ ka ecwee ŋolo ke epiini ŋolo eyai napuru, nai nyimuryakina ayoŋ ŋakiro ŋuna itubunit iyoŋ.

⁸⁴ Apaki ŋina etya ai emaikina ayoŋ eketiyan kon edaŋidaŋia? ori mono isicania iyoŋ ŋulu ekesicanito ayoŋ?

⁸⁵ Adaut ŋiketurok akibok ŋapanya aŋuna ka akikamunia ayoŋ; eŋerito ikes ŋikisila kon.

⁸⁶ Erae ŋakiciketa kon daadaŋ ŋuna ikinyoma; kiŋarakinae ayoŋ, ekesudete ayoŋ ŋituŋa ŋakiro koŋin.

⁸⁷ Eapi ikes akitadaun ayoŋ anakwap, nai nyeŋero ayoŋ ŋakiciketa kon.

⁸⁸ Kidar akiyar kaŋ anamina kon a ŋina nyiryaŋiryaŋa, ikotere ayoŋ ewuapi ŋakiro ŋuna itubunit iyoŋ.

Anupit ŋikisila ŋulu ke Ekapolon

⁸⁹ Okoe Ekapolon, iyai iyoŋ ŋikaru ka ŋikaru; eyai akirot kon jik nakuj.

⁹⁰ Eyai akikinyoma kon jik nanyameta daadaŋ; ibu iyoŋ tosub akwap, ido eriŋa eyai jik.

⁹¹ Eriŋa ŋisubuna kon eya tari nakoloŋit na, anerae ilipi ŋinibore daadaŋ neni kon.

⁹² Kerae nyalakara ayoŋ anakiwuapit ŋikisila kon, keridakinit ayoŋ aŋuna a ŋican kaŋ.

⁹³ Nyekemuryakinete ayoŋ jik ŋakiciketa kon, anerae ikiinak iyoŋ ayoŋ akiyar kaŋ alotooma ikec.

⁹⁴ Toiunae ayoŋ, anerae arae ayoŋ ŋini kon; anerae ewar ayoŋ ayenun ŋakiciketa kon.

⁹⁵ Akadapito ayoŋ ŋulu aronok ecamito akiar, nai atami ayoŋ ŋakiro ŋuna itubunit iyoŋ.

⁹⁶ Adau ayoŋ ayenun atemar eyakar ŋinibore daadaŋ asalunet, nai nyesalunete jik ŋakiciketa kon.

Amina ŋikisila ke Ekapolon

⁹⁷ Okoe ayoŋ amina nooi ŋikisila kon, atamatamae ayoŋ ikes apaaran jwii,

⁹⁸ Eketoosete ayoŋ ŋakiciketa kon akilo ŋimoe kaŋ, anerae ewuapit ayoŋ ŋakiciketa kon jwi jwi.

⁹⁹ Ayakar ayoŋ apiiryanut ŋina iloit ŋina a ŋiketatamak kaŋ a daadaŋ, anerae atamatamae ayoŋ ŋakiro ŋuna itubunit iyoŋ.

¹⁰⁰ Ayakar ayoŋ apiiryanut ŋina iloit ŋina a ŋikasikou, anerae ewuapit ayoŋ ŋakiciketa kon.

¹⁰¹ Nyitiya ayoŋ ŋakiro ŋadi ŋuna aronok aŋuna acamitor akiwuap akirot kon.

¹⁰² Nyimyekina ayoŋ ŋikisila kon, anerae iyoŋ elope idau akitatam ayoŋ.

¹⁰³ Ebobok nooi ŋakiro kon eirari ayoŋ, ebobok nooi akilo tari ao inyami!

¹⁰⁴ Aryamunit ayoŋ apiiryanut anakiciketa kon; aŋun, aŋerit ayoŋ ŋipitesyo ŋulu aronok daadaŋ.

Apiiryanut ŋina eyai lokisila a Ekapolon

¹⁰⁵ Erae akirot kon etaa ŋolo inwakunit neni alosyo ayoŋ ka arae akica alorot kaŋ.

¹⁰⁶ Adau ayoŋ akikoŋ, ido etogogoŋ akikoŋet ŋin, atemar ewuapi ŋakiro ŋuna itubunit iyoŋ ŋun iyookino.

¹⁰⁷ Adau ayoŋ aryamun ŋican ŋulu alalak; kiteyarae ayoŋ, okoe Ekapolon alotooma akirot kon.

¹⁰⁸ Tocamu, okoe Ekapolon akipuro kaŋ ŋina ekepuror ayoŋ iyoŋ ka acamit, kitatamae ayoŋ ŋakiro ŋuna itubunit iyoŋ.

¹⁰⁹ Tari daŋ kajalit ayoŋ akiyar kaŋ, nyekemuryakinete ayoŋ ŋikisila kon.

¹¹⁰ Adaut ŋulu aronok ayeun epite ŋolo aaret ayoŋ, nai nyimyekina ayoŋ ŋakiciketa kon.

¹¹¹ Ŋakiro ŋuna itubunit iyoŋ ikes ainakinet kon neni kaŋ ŋikaru ka ŋikaru; ikes erae alelyanu ŋina ke etau kaŋ.

¹¹² Elelyakinit etau kaŋ akiwuapit ŋakiro ŋuna itubunit iyoŋ tari natwanare kaŋ.

Aiuna alotooma ŋikisila ke Ekapolon

¹¹³ Nyekinyomit ayoŋ ŋituŋa ŋulu nyiwuakinito ŋatameta kec neni kon jik, nai amina ayoŋ ŋikisila kon.

¹¹⁴ Irae iyoŋ neni aŋopitor ayoŋ ka aupal kaŋ ŋina ipakarit ŋican kaŋ; ewuak ayoŋ akigeno kaŋ nakirot kon.

¹¹⁵ Toloto aneni kaŋ, iyes ŋulu itiyaete aronis, ikotere ayoŋ ewuapi ŋakiciketa ka Akuj kaŋ!

¹¹⁶ kitogogoŋoi ayoŋ alotooma akiikinet kon, ido oyar; nyikicamak ayoŋ ekesurumyo ŋileec anakigeno kaŋ.

¹¹⁷ Kitogogoŋoi ayoŋ, ikotere aruwor ŋini aiuna; orubak ewuapit ŋakiro ŋuna itubunit iyoŋ.

¹¹⁸ Iŋerenene iyoŋ ŋulu nyiwuapito ŋakiro ŋuna itubunit iyoŋ, anerae erae ŋakiro ŋuna itiyaete ikes ke epali ŋakoŋinae.

¹¹⁹ Imarakinit iyoŋ ŋulu aronok daadaŋ anakwap erae ŋikoŋinae; aŋun, amina ayoŋ ŋakiro ŋuna itubunit iyoŋ.

¹²⁰ Emarani akuwan kaŋ aŋuna akakeritor ayoŋ iyoŋ, eketubulito ayoŋ ŋatubonokineta kon.

Akiwuapit ŋikisila a Ekapolon

¹²¹ Adau ayoŋ akitiya ŋuna iyookino ka ŋuna ajokak nyikimyek ayoŋ anapedor a ŋulu ekesicanito ayoŋ.

¹²² Kiikinae ayoŋ eketiyan kon atemar ikiŋarakini iyoŋ ayoŋ; nyicamak ŋiketurok ekesicanete ayoŋ.

¹²³ Akaup ayoŋ akidarit aiuno ka akidarit akiikinet kon ŋina iyookino.

¹²⁴ Totiŋae ayoŋ eketiyan kon alotooma amina kon ŋina nyiryaŋiryaŋa, kitatamae ayoŋ ŋakiro ŋuna itubunit iyoŋ.

¹²⁵ Arae ayoŋ eketiyan kon; inakinae ayoŋ apiiryanut, ikotere ayoŋ ayenuni ŋakiro ŋuna itubunit iyoŋ.

¹²⁶ Okoe Ekapolon, adol apaki ŋina emaikina iyoŋ kitiyakinia ŋun, anerae abili ŋikisila kon.

¹²⁷ Kire jik, amina ayoŋ ŋakiciketa kon akilo egolid, akilo tari egolid ŋolo eliitae ejok.

¹²⁸ Kire jik, ewuapit ayoŋ ŋakiciketa kon daadaŋ; aŋerit ayoŋ ŋipitesyo a ŋulu aronok daadaŋ.

Acamit ŋina ka akiwuapit ŋikisila ke Ekapolon

¹²⁹ Erae ŋakiro kon ŋuna itubunit iyoŋ ŋuna ka aumokin; aŋun, ewuapit ayoŋ ikes.

¹³⁰ Epite ŋolo isileereunitere ŋakiro kon, ikiinakinete apiiryanut; einakinete apiiryanut neni a ŋulu emam ŋuna eyenete.

¹³¹ Ekeburito ayoŋ nooi ŋakiciketa kon.

¹³² Kiŋolikinae ayoŋ ka kisyoni ayoŋ, lopite ŋolo itiyaa iyoŋ jwi jwi neni a ŋulu eminasi ekiro kon.

¹³³ Kitogogoŋ ŋakejen kaŋ alotooma akiikinet kon, nyicamak ŋadyakanareta ekelounete ayoŋ.

¹³⁴ Tolakunae ayoŋ anakisicanio a ŋituŋa, ikotere ayoŋ ewuapi ŋakiciketa kon.

¹³⁵ Torimakinae ayoŋ eketiyan kon, ido kitatamae ayoŋ ŋakiro ŋuna itubunit iyoŋ.

¹³⁶ Eleleete ŋakiyo anakonyen kaŋ, anerae nyiwuapitae ŋikisila kon.

Akiyookino a ŋikisila a Ekapolon

¹³⁷ Okoe Ekapolon, irae iyoŋ ŋolo iyookino, iyookino ŋatubonokineta kon.

¹³⁸ Iyookino ŋakiro ŋuna idau iyoŋ atubun; erae ŋuna ikinyoma nooi.

¹³⁹ Alilit ayoŋ nooi, anerae emuryakis ŋimoe kaŋ ŋakiro kon.

¹⁴⁰ Adaun aanyun atemar iyookino jik ŋakiikineta kon, aŋun, emina eketiyan kon ikes.

¹⁴¹ Arae ayoŋ ecaryoit ka ŋolo akajamuwaritae, nyekemuryakinete ayoŋ ŋakiciketa kon.

¹⁴² Erae akiyookino kon akiyookino ŋina a ŋikaru ka ŋikaru, erae ŋikisila kon ŋulu a kire.

¹⁴³ Adau ayoŋ aryamun ŋican ka aryeba, nai akainakinito ayoŋ ŋakiciketa kon alakara.

¹⁴⁴ Iyookino ŋikaru ka ŋikaru ŋakiro ŋuna itubunit iyoŋ; inakinae ayoŋ apiiryanut, ikotere oyar.

Akilip aŋuna ka alakuno

¹⁴⁵ Anyara ayoŋ ke etau kaŋ a daadaŋ, toboŋokino ayoŋ, okoe Ekapolon, ikotere ewuapi ŋakiro ŋuna itubunit iyoŋ.

¹⁴⁶ Akanyarit ayoŋ iyoŋ; toiunae ayoŋ, ikotere ewuapi ŋakiro ŋuna itubunit iyoŋ.

¹⁴⁷ Anyoununui ayoŋ eriŋa nyiwalara, ido ekekaloik iyoŋ akiŋarakin ayoŋ; ewuakinit ayoŋ akigeno kaŋ nakiro kon.

¹⁴⁸ Akyenyi ayoŋ ŋisaae ŋulu ka akuwar daadaŋ, ikotere atamatamae ŋakiikineta kon.

¹⁴⁹ Kiira etoil kaŋ alotooma amina kon ŋina nyiryaŋyiryaŋa, okoe Ekapolon, alotooma ajokis kon, toiu akiyar kaŋ.

¹⁵⁰ Ekedunya ayoŋ ŋulu eyeete akitiya ŋuna aronok, nyiwuapito ikes ŋikisila kon.

¹⁵¹ Nai iapi iyoŋ aneni kaŋ okoe Ekapolon, ido erae ŋakiciketa kon daadaŋ ŋuna a kire.

¹⁵² Adau ayoŋ apaki ŋina aoyan ayenun ŋakiro ŋuna itubunit iyoŋ, atemar iwuakinit iyoŋ ŋakiro ŋun aruwor ŋuna a ŋikaru ka ŋikaru.

Adyekitoi aŋuna ka akiŋarakino

¹⁵³ Ekapolon, kiŋolik ŋican kaŋ, ido itolaku ayoŋ, anerae nyimuryakina ayoŋ ŋikisila kon.

¹⁵⁴ Toiunae ayoŋ ka tolakunae ayoŋ; inakinae ayoŋ akiyar alotooma akiikinet kon.

¹⁵⁵ Etyono ŋulu aronok aryamun aiuno, anerae nyemitakinito ikes ayenun ŋakiro ŋuna itubunit iyoŋ.

¹⁵⁶ Okoe Ekapolon, epol nooi akisyon kon; inakinae ayoŋ akiyar alotooma ŋikisila kon.

¹⁵⁷ Elalak nooi ŋimoe kaŋ ŋulu ekemanito ayoŋ, nai nyimyekina ayoŋ ŋakiro ŋuna itubunit iyoŋ.

¹⁵⁸ Ete ayoŋ ŋulu emam anupit eteŋeriyorit anerae nyiwuapito ikes ŋakiciketa kon.

¹⁵⁹ Kiŋolik mono iyoŋ Ekapolon epite ŋolo aminar ayoŋ ŋakiciketa kon; toiu akiyar kaŋ, okoe Ekapolon alotooma amina kon ŋina nyiryaŋiryaŋa.

¹⁶⁰ Erae ŋakiro kon daadaŋ ŋuna a kire; erae ŋikisila kon daadaŋ ŋulu iyookino ka ŋulu a ŋikaru ka ŋikaru.

Ainakina lokisila a Ekapolon

¹⁶¹ Ekemanito ayoŋ ŋikepukak koŋin, nai etopoloorit ayoŋ ŋakiro kon.

¹⁶² Alelyani ayoŋ alotooma akirot kon, lopite ŋolo elelyania ituŋanan ŋini eŋatari ibore ŋini alalan nooi.

¹⁶³ Aremokino ka nyacamit ayoŋ alyokonu, nai amina ŋikisila kon.

¹⁶⁴ Ekepurenene ayoŋ iyoŋ ŋarwa ŋakanikaarei alotooma akoloŋit, aŋuna a ŋikisila kon a ŋulu iyookino.

¹⁶⁵ Elal alakara aneni a ŋulu eminasi ŋikisila kon, emam ibore ipei daŋ ewani ikes.

¹⁶⁶ Okoe Ekapolon, egeno ayoŋ aiuno kon, etiyae ayoŋ ŋuna ebasi ŋakiciketa kon,

¹⁶⁷ Iwuapit etau kaŋ ŋakiro ŋuna itubunit iyoŋ, amina ayoŋ ikes a etau kaŋ a daadaŋ.

¹⁶⁸ Ewuapit ayoŋ ŋakiciketa kon ka ŋakiro ŋuna itubunit iyoŋ, anerae iyeni iyoŋ ibore daadaŋ ŋini etiyae ayoŋ.

Akilip aŋuna ka akiŋarakino

¹⁶⁹ Okoe Ekapolon, kiira akigworo kaŋ, okoe, inakinae apiiryanut anakiro kon.

¹⁷⁰ Kiira akilip kaŋ, tolakunae ayoŋ lopite ŋolo ikiinitor iyoŋ.

¹⁷¹ Ekepuri ayoŋ iyoŋ jwi jwi, anerae ikitatami iyoŋ ayoŋ ŋakiro ŋuna itubunit iyoŋ.

¹⁷² Aeikini ayoŋ ŋuna a ŋakiro kon, anerae iyookino ŋakiciketa kon daadaŋ.

¹⁷³ Ekapolon, kitemokino akiŋarakin ayoŋ, anerae aseu ayoŋ akiwuap ŋakiciketa kon.

¹⁷⁴ Okoe Ekapolon, eitanit ayoŋ aiuno kon, aryamunit ayoŋ alakara alokisila kon.

¹⁷⁵ Kimyekinae ayoŋ oyar ikotere ekepuri iyoŋ, kimyek ŋakiciketa kon ekeŋarakis ayoŋ.

¹⁷⁶ Adau ayoŋ aoliyor ikwa amesek ŋina eolit; kiwarae ayoŋ eketiyan kon, anerae nyimuryakina ayoŋ ŋakiciketa kon.