Ŋikiru. 118 - Ebaibul

Eete ŋolo ka akiloun

¹ Tolakaros neni ke Ekapolon, anerae ejok iŋes; erae amina keŋ ŋina nyiryaŋiryaŋa ŋina a ŋikaru ka ŋikaru.

² Emaikina ŋituŋa a Isirael temasi, “Erae amina keŋ ŋina nyiryaŋiryaŋa ŋina a ŋikaru ka ŋikaru.”

³ Emaikina ŋituŋa ka Aaron temasi, “Erae amina keŋ ŋina nyiryaŋiryaŋa ŋina a ŋikaru ka ŋikaru.”

⁴ Emaikina ŋituŋa ŋulu itopoloorito Ekapolon temasi, “Erae amina keŋ ŋina nyiryaŋiryaŋa ŋina a ŋikaru ka ŋikaru.”

⁵ Abu ayoŋ alocan kaŋ onyara Ekapolon, abu Ekapolon okoboŋok ayoŋ, tolema ŋican kaŋ.

⁶ Ikwapei eyakar Ekapolon diyete kaŋ, emam akuryanu eyai neni kaŋ. Anukiro epedorete ŋituŋa akitiya neni kaŋ?

⁷ Eyai Ekapolon diyete kaŋ akiŋarakin ayoŋ; eŋolikini ayoŋ ilounio ŋimoe kaŋ.

⁸ Ejok akikinyom Ekapolon, akilo akikinyom ŋituŋa.

⁹ Ejok akikinyom Ekapolon, akilo akikinyom ŋikepukak.

¹⁰ Apotu ŋakwapin daadaŋ ekerikaut ayoŋ; nai abu ayoŋ alokiro ke Ekapolon omunya ikes.

¹¹ Apotu ekerikaut ayoŋ alowaetin a daadaŋ, nai abu ayoŋ alokiro ke Ekapolon omunya ikes.

¹² Apotu kielun neni kaŋ ikwa ao, nai apotu todipakin atipei ikwa arira abu ayoŋ alokiro ke Ekapolon omunya ikes.

¹³ Apotu ŋituŋa a ŋakwapin ekesiryakis ayoŋ neni aronon, todikino akareunete, nai abu Ekapolon ekeŋarak ayoŋ.

¹⁴ Ekapolon iŋes agogoŋu kaŋ ka apedor kaŋ; iŋes akaiu ayoŋ.

¹⁵ Epupyo ŋitoilon ŋulu elelyanete aŋuna ka akiloun, anakais a ŋituŋa a ŋulu ka Akuj; ebasi, “Etiya apedor ke Ekapolon ŋina etiron ŋakiro ŋuna ka aumokin!

¹⁶ Ikidau iwon akiloun alotooma apedor keŋ; etiya apedor ke Ekapolon ŋina etiron ŋakiro ŋuna ka aumokin!”

¹⁷ Nyatwani ayoŋ, nai ayari, ido esera ŋakiro ŋuna adau Ekapolon akitiya.

¹⁸ Adau Ekapolon akisican ayoŋ nooi, nai nyipotokino iŋes ayoŋ natwanare.

¹⁹ Toŋakinae ayoŋ ŋikekya ŋulu ka akiyookino, ikotere alomari tooma, ido olakar neni ke Ekapolon.

²⁰ Epuke ŋolo ke Ekapolon iŋes lo, ŋolo elomaryata ŋulu iyookino.

²¹ Alakar ayoŋ neni kon aŋuna ikiboŋokinio ayoŋ; idau iyoŋ aruwor aiuno kaŋ.

²² Amoru ŋina aŋeretoe ŋikadukok, iŋes tokona itogogoŋit akai alokoona.

²³ Ekapolon elope etiya nu; erae ŋakiro nu ŋuna ikite iwon ŋuna etalakarak.

²⁴ Erae akoloŋit na ŋina ikitamunitor iwon, akoloŋit ŋina elounia Ekapolon ŋimoe yok, emaikina olelyana ka olakaros.

²⁵ Okoe Ekapolon, toiunae isua; okoe Ekapolon, inakinae isua akiloun.

²⁶ Erereŋ ŋini ebunit alokiro ke Ekapolon. Ikilakar isua neni kus a ŋulu iponito Kai ke Ekapolon.

²⁷ Erae Ekapolon Akuj, ikiinak iŋes iwon akica. Kisyakisi ŋasuban itiŋito ŋaten, kirimokisi Namuroet ilosete.

²⁸ Irae iyoŋ Akuj kaŋ, alakar ayoŋ neni kon; irae iyoŋ Akuj kaŋ, eketopoloori ayoŋ iyoŋ.

²⁹ Okoe olakaros neni ke Ekapolon, anerae ejok iŋes; erae amina keŋ ŋina nyiryaŋiryaŋa ŋina a ŋikaru ka ŋikaru.