Ŋikiru. 116 - Ebaibul

Alakar neni ka Akuj aŋuna ka aŋaleun

¹ Amina ayoŋ Ekapolon, anerae abu kiira akigworo kaŋ ka akilip kaŋ.

² Aŋuna abunio iŋes topupokinia ŋakiro kaŋ, anyarae ayoŋ iŋes ŋirwa daadaŋ ŋulu ka akiyar kaŋ.

³ Apotu ŋirotin ŋulu ka atwanare okorapuwasi ayoŋ, abu ekabule ŋolo ka alomar nakibois a ŋikatwak min neni kaŋ; apotu ŋican ka akiyaloloŋ eketapapanut ayoŋ.

⁴ Abu nai ayoŋ onyara ekiro ŋolo ke Ekapolon otema, “Okoe Ekapolon, ekelipit toiunae ayoŋ!”

⁵ Ejok Ekapolon ka iyookino; isyoniono Akuj yok.

⁶ Iyoki Ekapolon ŋulu epalag; ani apaki ŋina abunio ayoŋ opapanu nooi, abu iŋes okoiu ayoŋ.

⁷ Aŋun apedori tokona akiboi nabo emam ŋace, anerae etiya Ekapolon ŋuna alalak ŋuna ajokak neni kaŋ.

⁸ Okoe Ekapolon, idau iyoŋ alakun akiyar kaŋ anatwanare, ŋakonyen kaŋ anakigworo, ŋakejen kaŋ anakiguwanakino,

⁹ ikotere ayoŋ alosi alokiŋaren kon anakwap a ŋituŋa a ŋulu eyarete.

¹⁰ Abu ayoŋ onup, tari daŋ ŋina abunio ayoŋ otema, “Aryamunit ayoŋ ŋican nooi.”

¹¹ Abu ayoŋ anakadakinit kaŋ otema, “Erae ŋituŋa daadaŋ ŋikalyokonok.”

¹² Nyo ainakini ayoŋ Ekapolon aŋuna ka ajokis keŋ a daadaŋ neni kaŋ?

¹³ Aai ayoŋ epiini a ekopo neni ke Ekapolon ido onyara ekiro ŋolo ke Ekapolon.

¹⁴ Esiyookini ayoŋ ŋakikoŋeta kaŋ neni ke Ekapolon, aneni ilipyata ŋituŋa keŋ daadaŋ.

¹⁵ Epipil nooi aneni ke Ekapolon atwanare ipei a ŋiseuna keŋ.

¹⁶ Okoe Ekapolon, arae ayoŋ eketiyan kon; arae ayoŋ eketiyan kon, lokoku ka aketiyan kon; idau iyoŋ alacakin ayoŋ anatyokisyo a ŋuna akaenito.

¹⁷ Ayauni ayoŋ neni kon amuronot ŋina ka alakara, ido onyara ekiro kon okoe Ekapolon.

¹⁸ Esiyookini ayoŋ ŋakikoŋieta kaŋ neni ke Ekapolon, aneni ilipyata ŋituŋa keŋ daadaŋ,

¹⁹ analapatui a ŋuna ka Akai ke Ekapolon ka alokidiŋ kon, okoe Yerusalem. Kipuroe Ekapolon!