Ŋikiru. 115 - Ebaibul

Acaryoo a ŋakujo ka apolou ŋina ka Akuj

¹ Meere neni kosi, okoe Ekapolon, meere neni kosi, nai neni kon emaikina inakinae apolou, aŋuna ka amina kon a ŋina nyiryaŋiryaŋa ka akikinyoma kon.

² Kaanukiro iŋitatar ŋituŋa ebe, “Ai mono eyai Akuj kec?”

³ Eyai Akuj yok nakuj; itiyae daadaŋ ŋuna italakarito iŋes.

⁴ Nai erae ŋakujo kec esilipa ke egolid, ŋuna itiyaunito ŋituŋa.

⁵ Eyakatar ŋakitukwa, nai nyirworosi, eyakatar ŋakonyen, nai nyiteete;

⁶ eyakatar ŋaki, nai nyepupete, eyakatar ŋikumes, nai nyiŋuununuete;

⁷ eyakatar ŋakan, nai mam ibore itiyaete, eyakatar ŋakejen, nai nyelosete, mam tari etoil iiraryo aloporotoi kec.

⁸ Ikwaanikin ŋulu itiyaete ŋakujo ŋun ka ŋakujo ŋun, ŋulu ikinyomito ŋakujo ŋun daŋ, ikwaanikin ka ikes.

⁹ Okoe ŋituŋa a Isirael, kikinyoma Ekapolon! Iŋes erae ekeŋarakiniton kus ka ekaiunan kus.

¹⁰ Okoe ŋituŋa ka Aron, kikinyoma Ekapolon! Iŋes erae ekeŋarakiniton kus ka ekaiunan kus.

¹¹ Iyes ŋulu itopoloorito Ekapolon, kikinyoma Ekapolon! Iŋes erae ekeŋarakiniton kus ka ekaiunan kus.

¹² Ikitamunit ekapolon iwon ŋinapei, ido ikiterereŋi iwon; iterereŋi iŋes ŋituŋa a Isirael; iterereŋi iŋes ŋituŋa ka Aron;

¹³ iterereŋi iŋes ŋituŋa ŋulu itopoloorito iŋes, ŋulu cicik kaapei ka ŋulu apolok.

¹⁴ Elipi ikiyatak iyes Ekapolon, iyes kaapei ka ŋidwe kus.

¹⁵ Elipi ikiterereŋ iyes Ekapolon, ŋolo abu tosub nakuj ka akwap.

¹⁶ Erae kidiama nooi neni ke Ekapolon, nai ainaki iŋes ŋituŋa akwap.

¹⁷ Nyepedorete ŋikatwak akipur Ekapolon, nyepedorete jik ŋulu adaut alomar nakibois a ŋikatwak akipur Ekapolon.

¹⁸ Nai ikipuri iwon Ekapolon, ameun tokona tari ŋikaru ka ŋikaru. Kipuroe Ekapolon!