Ŋikiru. 111 - Ebaibul

Ekipur aŋuna a ŋiticisyo ka Akuj a ŋulu ka aumokin

¹ Kipuroe Ekapolon! Alakar ayoŋ neni ke Ekapolon a etau kaŋ a daadaŋ, anatukot a ŋulu iyookino ka aneni ilipyata ŋituŋa.

² Erae ŋiticisyo ŋulu ke Ekapolon ŋulu ka aumokin, ecamito ŋituŋa daadaŋ ŋulu elakara aŋuna a ŋiticisyo a ŋul ayenun ikes.

³ Epolok nooi ka eiliilete ŋiticisyo ŋulu ke Ekapolon, erae akiyookino keŋ ŋina a ŋikaru ka ŋikaru.

⁴ Nyecamit Ekapolon iwon ikimuryakis ŋiticisyo keŋ ŋulu ka aumokin; erimaana Ekapolon ka isyoniono.

⁵ Einanakini akimuj neni a ŋulu itopoloorito iŋes; etamunit iŋes jik acamunet keŋ.

⁶ Etoodik iŋes ŋituŋa keŋ apedor ŋina a ŋiticisyo keŋ aŋuna ainakinia ikes ŋakwapin a ŋituŋa a ŋice.

⁷ Erimaana ka iyookino iŋes alotooma ŋiticisyo keŋ daadaŋ. Erae ŋakiciketa keŋ daadaŋ ŋuna ikinyoma.

⁸ Erae ŋuna nyiloconokin ŋikaru ka ŋikaru, emaikina kiwuapae ikes anarimao ka anakiyookino.

⁹ Abu Ekapolon tolaku ŋituŋa keŋ; kiwuak acamunet ŋina a ŋikaru ka ŋikaru ka ikes. Erae iŋes ŋolo eseg ka ŋolo ekerer.

¹⁰ Akitopoloorit Ekapolon, iŋes erae akisyakinet ŋina ka aosou; ŋituŋa daadaŋ ŋulu iwuapito ŋakiciketa ke Ekapolon, eyakatar ayenut ŋina ajokan. Kipuroe Ekapolon ŋikaru ka ŋikaru!