Ŋikiru. 109 - Ebaibul

Akilip aŋuna ka akiŋarakino ka akinyaŋar (Ekiruk a Daudi neni a ŋolo apolokinit aeore)

¹ Okoe Akuj ŋina epuro ayoŋ, nyililiŋ kare ca,

² anerae ekerworotor ayoŋ ŋituŋa ŋulu aronok ŋulu amodiyanak, irworosi ikes alyokonu akaremokino ayoŋ.

³ Ekerikaununeete ikes ayoŋ irworosi ŋakiro ŋuna ekemanitotor; akabenyununeete ayoŋ emam ŋuna asecit.

⁴ Tari ketiyae ayoŋ neni kec ŋuna ka amina, ekesitanakinete ikes ayoŋ tari kelipi ayoŋ aŋuna kec.

⁵ Itiyaete ikes neni kaŋ aronis etiyae bo ayoŋ ajokis neni kec, ekemanito ikes ayoŋ omina bo ayoŋ ikes.

⁶ Ebasi ebe, “Oseutu ituŋanan ŋini aronon kitepeg iŋes; emyekisi ituŋanan idio towo kisitak iŋes.

⁷ Emaikina iŋes toryamunae esecit apaki ŋina isitakinere, emaikina iŋes kisitakinae aŋuna ilipya.

⁸ Emaikina iŋes totwana; emaikina ituŋanan ice kilunyokin lotic keŋ.

⁹ Emaikina ŋidwe keŋ toruwor ŋikokyok ka aberu keŋ toruwor apuserut.

¹⁰ Emaikina ŋidwe keŋ toruwor ŋikerimitok ŋulu ilipanarosi; emaikina ikes kiritarae aloreŋoroto a ŋulu iboiyoto.

¹¹ Emaikina ŋulu ideniyorito ŋiboro aneni keŋ tolemasi ŋiboro keŋ daadaŋ, emaikina ŋituŋa ŋulugelae toŋatasi ŋiboro ŋulu kebu iŋes toryamu.

¹² Emaikina todaun ituŋanan erimakini iŋes, kori ŋini isyoni ŋidwe keŋ ŋulukokyok.

¹³ Emaikina ŋiletok keŋ todaunos jik kikisarae ekiro keŋ ananyamet a ŋina ebunit.

¹⁴ Emaikina Ekapolon totamu ŋadyakanareta atapapa a keŋ, emaikina ŋasecisya a toto keŋ nyisyoni.

¹⁵ Emaikina nyimuryakis Ekapolon ŋasecisya keŋ jik, emaikina nyetamun ikes anakwap a na;

¹⁶ anerae abu ekile ŋol nyetamu akitoodiun arimao, nai abu kisican ka toar ŋikulyak ka ŋulu eyakatar akiitanit ta ŋulu eyaloloŋiyosi alocan kec.

¹⁷ Amina iŋes akicen, emaikina ŋicen ŋul pena neni keŋ pe; pa acamit iŋes akiterereŋ; emaikina ŋarereŋisyo toekasi aneni keŋ.

¹⁸ Arae ibore keŋ akicen ŋituŋa a ŋinapaki; emaikina ŋicen ŋul kiloŋiyasi iŋes ikwa ŋakipi, emaikina ŋicen ŋul kiibaasi iŋes ikwa akimyet.

¹⁹ Emaikina iŋes kiwok ŋicen ŋul, emaikina iŋes tolida ŋicen ŋul ŋirwa daadaŋ.”

²⁰ Elipi toruwor ŋun ŋuna eryamunete aneni ke Ekapolon ŋulu ekesitakinito ayoŋ, ŋulu irworosi ŋuna aronok akaremokino ayoŋ.

²¹ Nai okoe Ekapolon Akuj kaŋ, kitiya ŋuna ajokak neni kaŋ aŋuna ke ekiro kon, tolakunae ayoŋ aŋuna ka ajokis a ŋina ka amina kon a ŋina nyiryaŋiryaŋa,

²² anerae arae ayoŋ ŋolo a ŋican ka ŋolo ayakar akiitanit, ido eyaloloŋiyo etau kaŋ.

²³ Apuripuryaar ayoŋ ikwa etolim edoiyori akoloŋ; akakuta ayoŋ ekuwuam ikwa abeere.

²⁴ Alilimiyosi ŋakuŋin kaŋ aŋuna ka akiredanakin akiron elipi; alemun akuwan kaŋ ka aseny ayoŋ.

²⁵ Aruwor ayoŋ ejamuwaritono a ŋulu ekisitakinito ayoŋ; ani ekeŋolikinete ikes ayoŋ; kimuŋumuŋakis ŋakyes akajamuwarito.

²⁶ Kiŋarakinae ayoŋ, okoe Ekapolon Akuj kaŋ; toiunae ayoŋ aŋuna ka amina kon a ŋina nyiryaŋiryaŋa.

²⁷ Kimyek ŋimoe kaŋ toyenut atemar erae apedor kon etiyakinotor ŋun, ka erae iyoŋ okoe Ekapolon itiya ŋun.

²⁸ Kimyek ikes kilamanaros, nai ikiterereŋi iyoŋ ayoŋ. kimyek ŋimoe kaŋ kisurumae ŋileec; nai kimyekinae ayoŋ eketiyan kon olelyan.

²⁹ Kimyek ŋulu ekesitakinito ayoŋ tobutasi ŋileec, kiluluyasi ikes ŋileec lopite ŋolo ikiluluyarya ekaaso.

³⁰ Anakituk kaŋ, alakar ayoŋ nooi neni ke Ekapolon; epuri ayoŋ iŋes aneni ilipyata ŋituŋa,

³¹ anerae iuryarit iŋes ŋulu eyakatar akiitanit aŋuna ka aiun ikes aneni a ŋulu etubonokinete ikes atwanare.