Ŋikiru. 107 - Ebaibul

EKITAABO 5 (Ŋikirukisyo 107—150 ) Alakar neni ka Akuj aŋuna ka alakuno anatyokisyo a ŋuna alalak

¹ Tolakaros neni ke Ekapolon, anerae ejok iŋes; erae amina keŋ ŋina nyiryaŋiryaŋa ŋina a ŋikaru ka ŋikaru.

² Emaikina ŋulu alaku Ekapolon tolimosi ŋakiro ŋun, emaikina tolimosi ŋulu alaku Ekapolon alocan kec ŋakiro ŋun,

³ emaikina tolimosi ŋulu acunu Ekapolon anakwapin ŋakiro ŋun, ŋulu acunun alo Kide, alo To, alo Kuju ka alo Kwap.

⁴ Apotu ŋice kirimo analoŋisat aneni amam neni kitoro, nyeryamut erot ŋolo elosi lotaun neni epedoryata akiboiyo.

⁵ Abu akoro ka akure tonyam ikes, apotu ikes topapanut.

⁶ Apotu nai ikes kikaloikis Ekapolon alocan kec, ido abu Ekapolon tolaku ikes anatyokisyo kec.

⁷ Abu kiten ikes kitoryo lorot ŋolo acorosi, akitodol ŋina adolyoto ikes lotaun ŋolo apotu ikes kiboiyoto.

⁸ Emaikina ikes tolakar neni ke Ekapolon aŋuna ka amina keŋ a ŋina nyiryaŋiryaŋa, aŋuna a ŋiticisyo keŋ a ŋulu ka aumokin neni a ŋituŋa;

⁹ anerae einanakini Ekapolon ŋakipi neni a ŋulu enyamit akure, einanakini akimuj neni a ŋulu enyamit akoro.

¹⁰ Apotu ŋice kiboiyoto anakiryonut ka anakiyaloloŋ, arae ŋul ŋimabus ŋulu aenen a ŋiriko, ŋimabus ŋulu aya locan,

¹¹ anerae apotu ikes toŋero ŋakiro ka Akuj, tojamuwasi ŋakiro ŋuna ka Akuj a ŋina alokidiama nooi.

¹² Aŋun, abu Akuj inak ikes akitiya ŋiticisyo ŋulu apotu kisiyaloloŋiyosi ikes; apotu ikes kibusonokin, nai amam ŋini eŋarakinan ikes.

¹³ Apotu nai ikes kikaloikis Ekapolon alocan kec, ido abu Ekapolon toiu ikes anatyokisyo kec.

¹⁴ Abu yau ikes anakiryonut ka anakiyaloloŋ a ŋina apolon nooi a ŋin toŋedeŋedaa ŋiriko ŋulu aenitere ikes.

¹⁵ Emaikina ikes tolakar neni ke Ekapolon aŋuna ka amina keŋ a ŋina nyiryaŋiryaŋa, aŋuna a ŋiticisyo keŋ a ŋulu ka aumokin neni a ŋituŋa;

¹⁶ anerae ebilibilaari Ekapolon ŋipukei ŋulu itiyatae ke eburonis, etubutuboori ŋasuwa ŋuna iloritere ŋipukei.

¹⁷ Abu kimatimataa ŋice aŋuna aŋerito ŋakiro ka Akuj, ka apotu toryamut ŋican aŋuna a ŋadyakanareta kec.

¹⁸ Apotu toŋero ŋamuja daadaŋ, ido abu toapu ikes atwanare.

¹⁹ Apotu nai ikes kikaloikis Ekapolon alocan kec, ido abu Ekapolon toiu ikes anatyokisyo kec.

²⁰ Abu nai Akuj kiyakiya akirot keŋ neni kec, kitaŋaleu ikes, tolaku ikes anamunyaro.

²¹ Emaikina ikes tolakar neni ke Ekapolon aŋuna; ka amina keŋ a ŋina nyiryaŋiryaŋa, aŋuna a ŋiticisyo keŋ a ŋulu ka aumokin neni a ŋituŋa.

²² Emaikina ikes inakis Ekapolon ŋamuronisya ŋuna ka alakara ka tolimosi ŋiticisyo ŋulu ke Ekapolon alotooma ŋieosyo ŋulu ka alelyanu.

²³ Apotu ŋituŋa ŋul ŋice toloto nanam edokito ŋameeli; apotu ikes toruworos ŋimucurus ananamyo.

²⁴ Apotu kiŋolikis ŋiticisyo ŋulu ke Ekapolon, apotu kiŋolikis ŋiticisyo ŋulu ka aumokin aloburin a ŋanamyo,

²⁵ anerae abu Ekapolon kirworik, ido abu ekuwuam ŋolo apolon tokut, kisyakis ŋikaguragurae a ŋakipi ŋulu apolok atakanun.

²⁶ Apotu ŋikaguragurae a ŋakipi kikyaanasi ka totiyaununut ŋameeli; alotooma ŋican ŋul, abu ikes amukeo todaun.

²⁷ Apotu ikes kibusonokin ka kiryaŋanar esibit ŋulu emerasi, abu apiiryanut kec todaun.

²⁸ Apotu nai ikes kikaloikis Ekapolon alocan kec, ido abu Ekapolon toiu yau ikes anatyokisyo kec.

²⁹ Abu kitidipok ekuwuam, ido apotu ŋikaguragurae a ŋakipi ananam todipakin.

³⁰ Apotu nai ikes tolakar anerae abu anam todipakin, ido abu Ekapolon kitena ikes nakibois ŋina acamito alosit.

³¹ Emaikina ikes tolakar neni ke Ekapolon aŋuna ka amina keŋ a ŋina nyiryaŋiryaŋa, aŋuna a ŋiticisyo keŋ a ŋulu ka aumokin neni a ŋituŋa.

³² Emaikina ikes kitopoloosi Ekapolon aneni ilipyata ŋituŋa, kipuro iŋes anatukot a ŋikasikou.

³³ Abu Ekapolon kitoon ŋaŋololin deu, kituruwo ŋilelyan aonite neni icana ŋakipi.

³⁴ Abu kituruwo ŋalup ŋuna ajokak acumbi koŋin, anerae apotu ŋituŋa ŋulu eboiyete a nen toruwor ŋulu aronok.

³⁵ Abu kituruwo aloŋisat neni eya ŋataparin, abu kituruwo ŋalaroi ŋilelyan.

³⁶ Abu Ekapolon yau ŋulu enyamit akoro kiboiyoto a nen, ido apotu ŋul todukonokis ŋitaunio nakiboisyo ŋuna apotu ikes toloma.

³⁷ Apotu ikes kitata ŋimanikorin, todupanakis ŋikito ŋulu ke epiini, ido apotu tolema akimuj ŋina alalan nooi.

³⁸ Abu Ekapolon kiterereŋ ikes, topitut nooi, ido abu Ekapolon nyecamak ŋibaren kec ekudyokunete.

³⁹ Ani apaki ŋina akudyokunioto ŋituŋa ŋul ka ŋina apapanuniata, aŋuna ka akiimakinit ka ŋican ta akiyaloloŋ,

⁴⁰ abu Ekapolon toŋoik ŋikapolok kec, kituruwo ikes ŋikerimitok analoŋisat aneni amam erot.

⁴¹ Nai abu Ekapolon toiu ŋulu ayakatar akiitanit alocan kec, kiyatak ŋituŋa a ŋikalya kec, tolalata ikwa ŋisipanin a ŋamesekin.

⁴² Iŋolikinete ŋulu iyookino ŋakiro ŋun, tolakar, nai ani eruwor ŋulu aronok, ililiŋete totakin cek.

⁴³ Emaikina ituŋanan daadaŋ ŋini eos topupok ŋakiro ŋun, totamatama ŋuna ka amina; ke Ekapolon a ŋina nyiryaŋiryaŋa.