Ŋikiru. 106 - Ebaibul

Tolimosi Ŋisirael ŋasecisya kec

¹ Kipuroe Ekapolon! Tolakaros neni ke Ekapolon, anerae ejok iŋes; erae amina keŋ ŋina nyiryaŋiryaŋa ŋina a ŋikaru ka ŋikaru.

² Ŋae epedori akisera ŋiticisyo ke Ekapolon ŋulu ka aumokin, kori akipuro iŋes ejok nooi?

³ Elakara ŋituŋa ŋulu iwuapito akiyookino ŋina ka Akuj, ŋulu jwi jwi itiyaete ŋuna iyookino.

⁴ Totamunae ayoŋ, okoe Ekapolon apaki ŋina iŋarakinia iyoŋ ŋituŋa kon; kiŋarakinae ayoŋ daŋ apaki ŋina iunia iyoŋ ikes,

⁵ ikotere ayoŋ eŋolikini ŋituŋa kon ŋulu seuna, ikotere alelyani analakara a ŋituŋa a ŋulu ka akwap kon, emorikinos ka ikes ikipuro iyoŋ.

⁶ Ikidau isua akisec ikwapei atapapaa kosi; ikidau akitiya aronis, ikidau akitiya ŋuna aronok.

⁷ Ani apaki ŋina ayakatar atapapaa kosi Ijipit, nyemitakina ikes ŋiticisyo kon ŋulu ka aumokin, nyetamuna ikes alalau a amina kon a ŋina nyiryaŋiryaŋa, nai apotu toŋero Akuj ŋina alokidiama nooi apaki ŋina ayakatar diyete anam ŋina Areŋan.

⁸ Kikote neni daŋ, abu Akuj toiu ikes aŋuna ke ekiro keŋ, ikotere Akuj iteyenuni apedori keŋ ŋina etiron.

⁹ Abu Akuj kiyayak anam ŋina Areŋan, ido abu toono deu; abu Akuj kisitor Ŋisirael neni ecukul neni eonit deu, alopite a nolopei abu kisitor ikes naloŋisat.

¹⁰ Aŋun, abu Akuj toiu ikes anapedor a ŋimoe kec, tolaku ikes anapedor ke emoit kec.

¹¹ Apotu ŋakipi kitamata ŋimoe kec; mam ipei daŋ alomoe kec ŋini abu tobucar.

¹² Apotu nai Ŋisirael tonupa ŋakiro ka Akuj; toeikis ekipur neni ka Akuj.

¹³ Nai apotu ŋakiro ŋuna abu Akuj kitiya kimuryakis ikes; apotu nyidara Akuj alimokin ikes ŋakiro ŋadi.

¹⁴ Apaki ŋina ayakatar ikes naloŋisat, apotu toyakaunotor ka akiitanit ŋina apolon, ido apotu ikes kitemo Akuj analoŋisat.

¹⁵ Aŋun abu Akuj inak ikes ŋuna eŋitasi, nai abu Akuj kiyakik ikes edeke ŋolo amunyaran atipei.

¹⁶ Apotu ikes analomar kimana Moses ka Aron ŋolo arae eseuna ŋolo ke Ekapolon.

¹⁷ Abu akwap toŋaar, ido abu kiliko Dasan, tomuriya Abiram ka ŋituŋa keŋ.

¹⁸ Abu daŋ akim bu alokidiama nalomar kec; tonyamuwa akim ŋulu aronok.

¹⁹ Apaki ŋina ayakatar ikes Oreb, apotu kitiyaut itaok, ido apotu kilipa neni a ibore a ŋini etiyaunitae anasuwa.

²⁰ Apotu ikes tojoŋoto akilip neni ka Akuj, ido apotu kilipa neni a etorube a emoŋ a ŋolo erae ca ŋinya enyami.

²¹ Abu ikes kimuryak Akuj akaiunan kec, ŋina abu kitiya ŋakiro ŋuna apolok alo Ijipit,

²² ŋina abu kitiya ŋakiro ŋuna ka aumokin anakibois a ŋina ka Am, ka kitiya ananam a ŋina Areŋan ŋiticisyo ŋulu ikitubulete.

²³ Aŋun, abu Akuj tolimu atemar amunyari ikes. Ani kerae nyedyekit Moses ŋolo arae eseuna ŋolo ka Akuj aŋuna kec Akuj, nyemunya ikes ananyunyura keŋ, kemunyarit Akuj ikes.

²⁴ Apotu Ŋisirael toŋero akwap ŋina ajokan; apotu nyenupa akiikinet ŋina ka Akuj.

²⁵ Apotu kiŋuruŋura aloeemae kec, toŋero akiwuap ŋuna ke Ekapolon.

²⁶ Aŋun, abu Akuj kiserau ŋakiro keŋ, kikoŋ neni kec atemar imyekini iyoŋ ikes kirikaros analoŋisat,

²⁷ imyekini ŋiletok kec kiboiyosi nakwapin, ielari ikes nakwapin.

²⁸ Ani apaki ŋina ayakatar ikes Peor apotu kilipa neni a Baal, kimuja kaapei ka ŋituŋa a Peor ŋamuronisya ŋuna ainakinitae neni a ŋakujo;

²⁹ apotu ikes kitoŋoa Akuj aloticisyo kec a ŋulu aronok, ido abu edeke ŋolo enyasan min neni kec.

³⁰ Nai abu Pineas towo kilip aŋuna kec, ido abu edeke todaun aneni kec.

³¹ Eturuwosi ŋakiro ŋun Pineas ŋolo iyookino ŋinapei, ameun ananyamet ka apei tari ŋinace ŋikaru ka ŋikaru.

³² Apotu Ŋisirael kitoŋoa Ekapolon apaki ŋina ayakatar nakipi ŋuna a Meriba, ido abu Moses toryamu ŋican aŋuna kec;

³³ apotu ikes kitoŋoa Moses nooi, ido abu Moses kiburuburu alimun ŋakiro ŋuna pa eyookino.

³⁴ Apotu Ŋisirael nyemunyasi ŋituŋa ŋulu aya Kanaan lopite ŋolo sek alimokinitor Akuj ikes.

³⁵ Nai apotu ikes kimorikinos ka ŋituŋa a Kanaan, ido apotu kitiyata ŋuna etiyaete ŋituŋa a Kanaan.

³⁶ Apotu kilipa neni a ŋakujo a ŋituŋa a ŋul, ibore ŋini abu yau amunyaro kec.

³⁷ Apotu yaanasi ŋidwe kec ŋulusapa ka ŋulupesur neni a ŋakujo erae amuronot.

³⁸ Apotu ikes toara ŋidwe kec ŋulu amam ibore asecito, tobukosi ŋaokot a ŋidwe kec a ŋulusapa ka ŋulupesur a ŋulu apotu ikes yaasi erae ŋamuronisya neni a ŋakujo a ŋuna alo Kanaan; apotu ŋaokot a ŋidwe a ŋul kituruwosi ŋituŋa ŋul ka akwap kec ŋina emam ajokis eyai.

³⁹ Aŋun, apotu ikes toruworos ŋulu emam ajokis alotooma ŋuna etiyaete, apotu ikes toŋero Akuj aloticisyo kec kilipa neni a ŋakujo.

⁴⁰ Aŋun, abu Ekapolon toŋoik ŋituŋa keŋ, abu Ekapolon toŋer ŋituŋa keŋ.

⁴¹ Abu Akuj kipotok ikes napedor a ŋituŋa a ŋakwapin, ikotere ŋulu sek aremokino ikes ipukaete ikes.

⁴² Apotu ŋimoe kec totiŋa ikes neni aronon, toreikis ikes akiwuap acamit kec.

⁴³ Ŋapakio ŋuna alalak, abu Akuj tolakununu ikes, nai aŋereneneete ikes Akuj alotooma ŋuna etiyaete ikes, ido aponi ikes kituruworoe ŋicaryo aŋuna a ŋasecisya kec.

⁴⁴ Kikote neni daŋ, abu Akuj kisyoni ikes alocan kec, apaki ŋina eirarya akigworo kec;

⁴⁵ aŋuna kec, abu Akuj totamu acamunet keŋ, ido anamina keŋ a ŋina apolon, a ŋina nyiryaŋiryaŋa, abu Akuj kisyoni ikes.

⁴⁶ Abu inak daadaŋ ŋulu sek atiŋito ikes erae ŋirikon kisyonito ikes.

⁴⁷ Toiunae isua, okoe Ekapolon Akuj kosi, tocununae isua anakwapin, ikotere isua ikilakar aŋuna ke ekiro kon a ŋolo asegan, kitopolooroe akipuro iyoŋ.

⁴⁸ Akipuro toyai neni ke Ekapolon, Akuj ŋina a Isirael, ameun tokona tari ŋikaru ka ŋikaru. Emaikina ŋituŋa daadaŋ temasi, “Amen.” Kipuroe Ekapolon!